Бейнебайланыс арқылы өткен ынтамақтастық жиынында Алматы облысының инвестициялық тартымдылығы мен екі ел кәсіпкерлерінің бірлескен жобалары туралы да сөз болды. Бүгінде өңірге инвестиция тарту бағыты бойынша нақты шаралар қабылданған, оның нәтижесі де жоқ емес. Мысалға, қазір Алматы облысы әлем бойынша 97 елмен сауда ынтымақтастығын жүргізуде. Биылғы 7 айда облыстағы экспорт айналымы 179,9 млн АҚШ долларын құрады. Бұдан басқа шетелдік инвесторлардың қатысуымен ашылған, жалпы құны 1,3 млрд АҚШ доллары болатын 19 жоба жүзеге асырылуда. Бұл 6 500 жұмыс орнын құруға мүмкіндік береді.
Осы санатта көршілес Қытай елімен де сауда-саттық, өнеркәсіптік байланыс тереңдеп отыр. Атап айтқанда, инвестициялық портфелі 94,5 млрд теңге болатын және 350 адамға тұрақты жұмыс орнын ұсынатын «Жетісу вольфрамы» жобасы бойынша келісім іске қосылу сатысында екен. Жоба бойынша қытай елінің инвесторлары Алматы облысының аумағындағы «Бұғыты» вольфрам кен орнын игеруге кіріскен. Ал тағы бір айтулы жоба – «Жетіөзеннің қуаты» жобасы жалпы инвестиция сомасы 37,4 млрд теңгені құрайтын, қуаты 60 МВт болатын «Шелек» жел электр стансасының құрылысын жүзеге асырады. Жоба іске қосылғанда 30 адамға тұрақты жұмыс орны ашылмақ.
– Алматы облысы мен Қытай Халық Республикасы арасындағы экономикалық қатынастардың қазіргі жағдайы жаңа бірлескен жобаларды іске асыру бойынша үлкен мүмкіндіктер ашады. Бүгінде логистика, туризм, ауыл шаруашылығы, жаңартылатын энергия көздері, өңдеу өнеркәсібі, құрылыс материалдарын өндіру және фармацевтика сынды экономиканың салалары өңірді дамытудың басым бағыттары болып отыр. Еліміздің оңтүстік-шығысында орналасқан біздің облыс пен көрші елмен ортақ шекарасы 300 шақырымнан асады. Және Алматы облысы – «Ұлы Жібек жолы» бойында жатқан төрт облыстың бірі, сондай-ақ өңір «Батыс Еуропа – Батыс Қытай» халықаралық маңызы бар автомобиль дәлізінің ажырамас бөлігі саналады. Яғни екіжақты серіктестіктің серпін алатын сәті туды, – дейді Алматы облысының әкімі Марат Сұлтанғазиев.
Яғни Алматы облысының трансконтиненталды дәліз бойында орналасуы аймақ үшін ғана емес, тұтас ел экономикасына табыс әкелетін жобаларды жүзеге асыруға мүмкіндік береді. Ал көрші мемлекет үшін Шығыс қақпадағы аймақпен әріптестік 183 млн шамасындағы адами әлеуеті бар Еуразиялық экономикалық одақ нарығына шығудың тиімді жолы болып отыр.
Айтпақшы, дәл осы трансконтиненталды дәліз бойынша сауда және экономикалық әріптестікті дамыту мәселелері Қазақстан – Қытай ынтымақтастығы бойынша «Достық диалогі» атты телекөпірде кеңінен талқыланды. Ал жиын қорытындысында Алматы облысының әкімі Марат Сұлтанғазиев пен Қытайдың ШҰАР халық үкіметінің төрағасы Еркін Тунияз Шыңжаң өңірімен бауырластық байланыс орнату ниеті туралы хаттамаға қол қойды.
Алматы облысы
