26 жастағы Алматы қаласында туып-өскен Әли бозбала шағынан танымал бапкер Сағатбек Мұсахановтың қол астында жаттықты. Әуесқойлар арасында түрлі жарыстарға қатысып, жеңіс тұғырына көтерілді. Ересектер арасында ел біріншілігінің қола жүлдегері, бірқатар халықаралық турнирдің жеңімпазы атанды. Еліміздің еңбек сіңірген жаттықтырушысы Дастан Сәдуақасовтың жетекшілігімен студенттер арасында әлем және Азия чемпионаттарына қатысып, жеңіс тұғырының ең биік сатыларына көтерілді. 2016 жылы Ахмедов кәсіпқой рингте күш сынасуға бел буды. Сол аралықта 18 кездесу өткізіп, 17-сінде жеңіске жетті. 14 бәсекені мерзімінен бұрын аяқтады. Осыдан екі жыл бұрын Әлидің IBF нұсқасы бойынша екінші орта салмақта әлем чемпионы атануға тамаша мүмкіндігі болды. Бірақ ол эквадорлық Карлос Гангораға есе жіберді.
Лас-Вегаста Әли Ахмедов Габриэль Росадомен күш сынасады. 36 жастағы АҚШ боксшысы 42 кездесудің 26-сында жеңіске жетіп, 15 қарсыласын есінен тандырды. 14 жекпе-жекте жеңіліс тапты. Бір бәсеке тең аяқталса, тағы біреуінің нәтижесі есепке алынбады. 2013 жылы Росадо біздің Геннадий Головкинмен жұдырықтасып, жетінші раундта техникалық нокаутпен ұтылды.
