Ұлттық ұлан баспасөз қызметінің мәліметінше, елорданың қоғамдық тәртібін тиісті деңгейде қамтамасыз ету, сондай-ақ маңызды іс-шарада құқық бұзушылықтың алдын алу және жолын кесу мақсатында 5573 әскери бөлімінің жеке құрамы 13 қыркүйектен бастап күшейтілген қызмет режіміне ауыстырылған. Елордалық жедел құрамадан 1 200-ге жуық әскери қызметші делегация мүшелерін қарсы алу, олардың қала ішінде қозғалуы кезіндегі қауіпсіздікті қамтамасыз ету қызметін атқарып жатыр.
Сондай-ақ жедел күштерді күшейту үшін Қарағанды және Көкшетау қалаларынан Ұлттық ұланның 600-ден астам әскери қызметшісі келген.
– Елордаға әлемнің түкпір-түкпірінен қонақтардың келуіне байланысты қоғамдық орындарда, көшелерде, сондай-ақ мәдени-бұқаралық іс-шаралар өткізілетін жерлердегі қауіпсіздік шаралары күшейтілді. Мәселен, бұқаралық ақпарат құралдары Рим Папасы Францисктің қатысуымен өтетін іс-шараға 7 мыңнан астам адам қатысқанын хабарлады. Қоғамдық тәртіпті қамтамасыз ету үшін Ұлттық ұланның 5510, 5451 әскери бөлімдерінің жеке құрамы келді. Олардың халықаралық көрмелерді, сондай-ақ басқа да ірі мәдени және спорттық іс-шараларды өткізу кезінде елордада құқықтық тәртіпті қадағалауда тәжірибелері бар. Себебі бұған дейін ЭКСПО-2017 халықаралық көрмесі және елорданың 20 жылдық мерейтойы кезінде де арнайы келген болатын, – дейді «Орталық» өңірлік қолбасшылығы қолбасшысының бірінші орынбасары – штаб басшысы, полковник Нұрбол Міртаев.
«Осындай тарихи оқиға кезінде елордада қызмет атқарып жатқаныма қуаныштымын. Ұлттық ұланға келгеніме 9 ай болды, осы уақыт ішінде Жезқазған қаласына, жаңадан құрылған Ұлытау облысына ел Президенті барған кезде қауіпсіздікті күшейтуге жұмылдырылған бөлімше құрамында болдым. Ұлттық ұландағы қызмет өте қызықты, күнделікті қызметтен басқа, мемлекеттік және халықаралық іс-шаралар барысында қоғамдық тәртіпті сақтауға үлес қосатынымды мақтан тұтамын», дейді 5451 әскери бөлімінің қатардағы сарбазы Диас Қайырбаев.
Рим Папасы Францисктің, сондай-ақ алыс және жақын шетел делегациясының қатысуымен өткен Әлемдік және дәстүрлі діндер көшбасшыларының VII съезі кезінде құқықтық тәртіп әскеріне маңызды міндеттер жүктелді. Сондай-ақ ұландықтарға Қазақстандағы Ватикан Қасиетті Тағының елшілігін қорғау міндеті жүктелген.
