Батыс Қазақстан облысында еділбай тұқымдас саулық төрт қозы туды

ОРАЛ. 16 мамыр. Батыс Қазақстан облысы, Жаңақала ауданында еділбай қойы төртем туды. Бұл туралы egemen.kz тілшісі хабарлады. Жаратылыс берейін десе шектен тыс мырзалық танытатыны бұл жолы тағы да дәлелденді. Шалғайдағы Жаңақала ауданының тұрғындары ерлі-зайыпты  Бектемір мен Света Бекқалиевтердің жеке иелігіндегі саулықтың бірі бірден төрт қозы тапты. Асыл тұқымды еділбай қойы негізінен бір қозы туатыны селекциялық тәжірибеден жақсы белгілі. Осыған қарамастан биыл төрт қозы туған саулық соңғы екі жыл қатарынан үшеуден төлдепті. Алайда, қақаған қыста төлдегендіктен, нәзік, қызылшақа қозылар өліп қала береді екен. Ал биылғы төрт қозы ойнақтап, ет жинап келеді. Таңсықты көрмек үшін іздеп елге барғанда қой өрістен келіп жатыр екен. Саулықты бөлектеген үй иесі аналықтың жанынан төрт қозысын қатар жіберді. «Қой сүйеді баласын қоңырым деп...» ауыз әдебиетінде айтылғандай, аналық қой төрт төліне қатар еміренеді. Қозылар болса таласа-тармаса анасының емшегін сорғылауға кірісті. Қой иесі: «Мұндай жағдайда саулық сүті біріне көп, біріне артық кетуі мүмкін. Сондықтан қозыларды екеуден шығарып, кезекпен емізуді қажет деп тауып отырмыз. Әрі бұған қосымша сүт береміз», – деді. Темір Құсайын. Дереккөз: egemen.kz. Фото: egemen.kz.