Ғалым кітаптың алғысөзінде өзін Орталық Азия мен Ресейдің қазіргі тарихы мен мәселелеріне жіті назар аударатын тарихшы және аймақтанушы ғалым ретінде таныстырады. Ол бүгінде Стаффордшир университетінде жұмыс істейді. Ғалым осы уақытқа дейінгі зерттеулерінің басым бөлігін Орталық Азиядағы революциялық және ерте кеңестік кезеңге (шамамен 1917-1934 жылдар) арнаған екен.
Алун Томас «Қазақ көшпелілері және жаңа Кеңес мемлекеті, 1919-1934 жылдар» атты тақырыпта докторлық диссертация қорғап, осы тақырып төңірегінде көзқарасын ашық әрі бүкпесіз жеткізеді. Аталған ғылыми еңбекте 1920-жылдардағы Кеңес өкіметі мен көшпелі халықтар арасындағы қарым-қатынас сипатталады. Тарихшы еңбекті жазу барысында Қазақстандағы және Ресейдегі мұрағат дереккөздеріне сүйенген. Доктор Томастың бұл ғылыми еңбегінде КСРО-ның шеткері аймақтарындағы кеңестік басқарудың отарлаудан кейінгі кезеңіне де тоқталады.
Алун Томас аталған еңбегінде Кеңес өкіметінің жаңа экономикалық саясатының қазақ және қырғыз көшпелілеріне тигізген зардабын зерттеп, Кеңес Одағының көшпелілерге деген көзқарасын сөз етеді. Бұл кітапты революция мен ұжымдастыру арасындағы кезеңді мұқият зерттеген шетелдік ғалымның іргелі зерттеуі деуге болатындай. Мұнда алғашқы кеңестік тарихтың кейбір аспектілеріне тың түсініктер берілген.
Алун Томас осы еңбекке қатысты берген сұхбатында: «Менің бұл кітабым, ең алдымен, шамамен 1921-жылдан 1928-жылға дейін созылған Жаңа экономикалық саясат (ЖЭС) кезеңіне арналған. Ұжымдастыру кезінде асыра сілтеуге жол берілді, зорлық-зомбылық көп болды. Большевиктер көшпелілердің өмір салтына килігіп, ауыр алым-салық салып, олардың жағдайын қиындатты», дейді.
Айтпақшы, ғалымның осы еңбегіне 2018 жылы Британдық славян және шығысеуропалық зерттеулер қауымдастығының Александр Нов атындағы сыйлығы берілген.
