Мемлекетіміздегі саяси реформалардың заңды жалғасы іспеттес 2022 жылдың 20 қарашасына белгіленген ел Президентін кезектен тыс сайлау – әлемдік сын-қатерлер аясындағы жаңа тарихымыз бен тағдырымыздың қайнауынан туындаған шешім деп сеніммен айта аламыз.
Бұл саяси жүйені толық серпілтуге бағытталған қадам болмақ. Елдің басшысы – алқалаған әлеумет мүддесін орындаушы. Сондықтан мемлекеттің сын сағатында жауапкершілікті өз мойнына алып, елдің бұрынғы-кейінгі қордаланған өзекті де өткір мәселелерін оңтайлы шешуге жұмылуы – маңызды бағдар деп білеміз.
Қазақстанның соңғы ай мен аптадағы саяси жаңалықтарынан хабардар қауым жаһан өрісіне себепші үш алып елмен арадағы байланысымыздың жаңа кезеңін аңғарса керек. Қытай басшысы Си Цзиньпин қазақ еліне ресми сапары қарсаңында жариялаған мақаласында шекаралас екі мемлекет арасындағы қарым-қатынастың тарихи тамырын, бүгінгі жетістігін айта келіп, жаңғыруымыз бен қауіпсіздігімізді барынша қолдайтынын жеткізді. Мұны құдайы көрші ақысы ғана емес, халықаралық саяси тәуелсіз баға деуге негіз бар.
Жаһандық күрделі текетірестің жуан ортасында жүрген Ресей президенті Владимир Путин де Қазақстандағы саяси реформалар мен жаңашыл ізденістер ТМД, ШЫҰ аясында оң нәтиже бергеніне елеулі дәлел келтірді.
Байырғы ата сөзімізде «Тар таласып тозар, кең кеңесіп озар» деген даналық бар. Әлемде қырғи-қабақ әрекет қайта жанданғанда, Еуразия өтіндегі тарихы толғамалы Қазақстанның ашықтық пен достық ұстанымынан ұтылған алыс-жақын көршіні көрмедік. Ұлы даланың бұл аманаты әлі талай уақыт жанымызға жалау, өремізге өріс болары сөзсіз.
Мемлекет басшысы БҰҰ Бас Ассамблеясына барған сапары кезінде АҚШ-тың Politico газетіне берген сұхбатында: «Ұлттық ой-санамыз кейінгі жылдары бастан өткерген терең әлеуметтік өзгерістерден, экономикалық және қауіпсіздік дағдарысынан туындаған, бәрінен де гөрі біз әлдеқайда әділетті, әрбір азаматқа қызмет ететін ел құруымыз керек екенін айқындаған түбегейлі өзгеріс деңгейіне көтерілді деп санаймын», деп атап көрсетті.
Ал БҰҰ 77-сессиясының пікір алмасу алаңындағы: «Қазақстан Президенті ретіндегі ұстанымым – әрбір азамат тең мүмкіндіктерге ие әрі құқығы қорғалған Әділетті Қазақстанды құру. Менің елімде әділдік салтанат құруы керек. Заң мен тәртіп қоғамымыздың негізі болады. Бұл жолдың ең маңызды бөлігі – трансформациялық саяси реформалар. Алдағы айларда Қазақстанда президент және парламент сайлауы өтеді. Мен Президент өкілеттігін жеті жылдық бір мерзіммен шектеуді ұсындым. Бұл – Қазақстанда демократияны дамытудағы нағыз серпіліс», деген сөзі Америка мен әлемнің жетекші мемлекеттеріне ел ұстанымын танытудың өркениетті жолы еді.
Таяудағы Әлемдік және дәстүрлі дін көшбасшыларының 7-съезіне қатысқан ірі рухани тұлғалар да Қазақстандағы береке-бірліктің, саяси трансформацияның жаңа кезеңіне көзі жетіп, көңілі сенді. Бұл – еліміздің зор абыройы.
Иә, қазір қоғамымыз жаңару үдерісін бастан кешіп отыр. Билік пен әлеумет үдемелі, сапалы саяси қарым-қатынас деңгейіне бет түзеді. Мұның қос тарапқа да сын һәм сынақ екені түсінікті. Біз бұрынғы негізгі ұстанымнан кіндігімізді үздік. Мұның тәуекелмен бірге қайыры бар екенін сезіне білгеніміз абзал. Ол қайырдың атауы – әділетті мемлекет, біртұтас ұлт, берекелі қоғам.
Қарапайым жұртшылық, зиялы қауым Қазақстан жаңаруының ақиқатына сене бастады. «Игілік басы – ынтымақ» деп осындайда айтса керек.
Президенттің бір реттік және жеті жылдық өкілеттігі – қанағат пен іс нәтижесін көрсететін шама. Әлем тәжірибесі мен Қазақстанның қауіп-қатерді ескеріп барып ұсынған жолы – бірін-бірі терістемейді, қайта жаңа ізденіспен толықтырады. Халық ішінде айтылып қалатын «Ата заңға бітпейтін түзету» сынына бұл өзгеріс, бұл жаңа тәжірибе шыдас береді деп санаймыз. Өйткені оған кепіл – халық сенімін алатын, дұрысы ел аманатын арқалайтын Президенттің өзі болмақ. Біз негізгі заңдық-құқықтық құжаттарымызда «суперпрезиденттікке жол берілмейтінін» шегелеп көрсеттік. Биік мінберден оның орындалу тетігін де айттық.
Ұлт ұстазы Ахмет Байтұрсынұлы: «Өткенді қуғанды қойып, осы күйіңді жөндеуге жөн іздеу керек», деп жазып еді. Дәл бүгін біз сенімсіздік пен күдікке жол берген уақытты артқа тастап, сенім мен әділетке иек артуымыз қажет. Адамның адал ниетіне құт қонады, қоғамның байыпты байламына бақ тұрақтайды.
