Сарапшылар референдум нәтижелерін бекіту мақсатында президенттік, парламенттік және мәслихаттық мандаттарды жаңарту маңызды екенін де атап өтті. Сондықтан сарапшылар қоғамдастығы үшін де, саяси топтар үшін де сайлау болжамды қадам болды.
Алдағы кезектен тыс президент сайлауын осы уақытқа дейін елімізде қабылданған саяси реформаларды жүзеге асырудың тетігі деп айтуымызға толық негіз бар. Өйткені азаматтар сайлауға қатысу арқылы еліміздің саяси жаңғыруына, жаңа демократиялық модельге көшуіне қолдау білдіреді.
Сайлау саяси процесс ретінде бірқатар маңызды функцияны атқарады. Біріншіден, сайлау билік органдарын қалыптастырудың демократиялық тәсілі ретінде саяси режім мен сенімді заңдастырудың құралы ғана емес, сонымен қатар азаматтардың саяси белсенділік танытуының, олардың сұраныстарын, мүдделерін, қоғамдық шоғырлануын, биліктің азаматтармен кері байланысын қамтамасыз етудің және саяси мәдениетті қалыптастыру мен дамытудың, саяси өмірге қатысу дағдыларын игерудің маңызды құралы.
Екіншіден, сайлау – азаматтарды толғандыратын сұрақтар мен мәселелерді шешудің жаңа мақсаттары мен бағдарламаларын ұсынудың, жалпы әлеуметтік-экономикалық, саяси бағытты орнықтыру тәсілі. Сондықтан алдағы сайлау халықты біріктіруге бағытталған. Жалпы әлемдік трендтерді назарға алатын болсақ, азаматтарға алдағы жолдың бағдары мен нақты жоспарларды айқын түсіну қажет. Сайлау конституциялық реформалардың жетістіктерін бекітіп қана қоймай, басқа салалардағы реформаларды жалғастыру мен күшейту үшін қажетті уақыт пен сенім мандатын береді. Ең бірінші кезекте әлеуметтік және экономикалық салаларда.
Жалпы сайлау қоғамдық өмірге белгілі бір циклдік сипат беріп, жүріп өткен жолды қорытындылап, болашаққа назар аударуға мүмкіндік жасайды.
Алуа ЖОЛДЫБАЛИНА,
Президент жанындағы ҚСЗИ
директорының орынбасары
