Қыркүйектің мизамында облыстық Өнер музейінің мұрындық болуымен, Шығыстың бір топ суретшілері асай-мүсейлерін асынып, пленэрге шыққан. Рас, өңірдің қай бұрышы болмасын, табиғаты құлпырып тұр. Тіпті жаздың күні мұншалықты сұлу болар ма еді?!
Дәстүрлі пленэрде қылқалам шеберлері бір жылы Батыс Алтайды бейнелесе, енді бірде Катонқарағай асып кетеді. Биылғы сапар Ұлан ауданына түсті. Өскеменнен тым қашық емес, Баяш Өтепов ауылына жетіп тоқтаған. Бұл мекеннің тау-тасы, орман-тоғайы өзге жерге ұқсамайды. Тау басы тақырлау болып келгенімен, етегінен сызылып өзен ағады. Өзен бойы тұтасқан орман.
Құдаш Нұрсадықов, Виктор Калинин, Ержан Тұрғанбаев сынды кәсіби суретшілер автобустан түсе сала, әр жерге орнығып алып, этюд жазуға кірісіп кетті. Ал «Жұлдыз» өнер мектебінің бейнелеу өнері пәні мұғалімдері Елена Машкина, Оксана Артеменколар алдыңғы толқын ағаларынан ақыл-кеңес алып, шеберліктерін шыңдады.
Дәстүрлі пленэрде «Жаңғыру» шығармашылық бірлестігінің мүшелері Мәди Қайырхан мен Данияр Алдабергенов таңдай қақтырар этюдтер жазып, ұстаздары тарапынан жылы лебіздер естіді.
– Табиғат аясындағы этюд шынайы әрі құнды. Жанды картина деуге болады. Биыл кезекті күзгі пленэрге шықтық. Осы сапарды ұйымдастырған Өнер музейі қызметкерлеріне ризамыз. Сондай-ақ біздің бойымыздағы аздаған өнерді байқап, жетелеп жүрген ұстаздарыма алғыс айтамын, – дейді жас суретші Мәди Қайырхан.
Бүгінгі пленэрдің ерекшелігі, картина жазғанды қойып, қолға қылқалам ұстап көрмеген музей қызметкерлері де кенеп бетіне бояу түсірді. Кәсіби суретшілердің бағыт-бағдарына құлақ аса отырып жазылған полотноларға қарап, нағыз шеберлердің жұмысы дерсіз.
Күні бойы тынбай этюд жазылды, кешкілік көрме ұйымдастырылды. Үздік картина авторлары Өнер музейінің атынан сертификаттар мен кәдесыйлар табысталды.
Шығыс Қазақстан облысы
