Қарағандыда Нығмет Нұрмақов атындағы дарынды балаларға арналған мамандандырылған лицей-интернат бар. Бұл мектеп оқушыларының бәйгеден қанжығалары бос қайтқан кезі жоқ. Өйткені мұнда білімнің мәйегін ішкен ұстаздар қызмет етеді. Атағынан ат үріккендей білім ошағы бүтін республикаға танымал. Мұнда жаратылыс пәндері бойынша қазақ, орыс және ағылшын тілдерінде білім беретін мамандар жиналған. Полиглот шәкірттері де білім бәсекесінде шаң қауып көрген емес.
Ағылшын тілінде физика пәнінен сабақ беретін Ерсін Әділбаевтың есімі өңірге мәлім. Еңбек жолын Жезқазған қаласындағы №3 Білім және инновация лицейінде бастаған Ерсін Бекежанұлы – қазіргі таңда ағылшын тілінде физикадан дәріс беретін республикадағы бірден-бір тренер. Көптеген республикалық, халықаралық байқаудың жеңімпазы. Атап айтқанда, «Кәсіби мұғалімдер желісі» Қарағанды облыстық байқауының жүлдегері, Science on Stage Qazaqstan 2018 республикалық фестивалінің жеңімпазы. Сол бәсекеде Португалия мемлекетінде өтетін халықаралық фестивальға жолдама алғанын да айтқан ләзім. Мұның сыртында түрлі деңгейдегі мадақтамалары аз емес.
Солтүстік Қазақстан облысының тумасы Ерсін Жезқазған қаласындағы Ө.Байқоңыров университетінде физика мамандығы бойынша білім алған соң еңбек жолын еш ойланбастан мұғалімдікке арнаған екен. Үш тілде білім алудың қажеттігін, оның кең өріс ашатынын ұғыныпты. Содан өз бетінше ағылшын тілін меңгеруге кіріскен екен.
– Физика мамандығын бітіріп, ағылшын тілін оқуға кірістім. Сол уақытта үш тілде білім алу туралы мемлекет бағдарламасы шықты. Физика, химия, биология, информатика – төрт пәнді үш тілде беру саясаты мені қатты қызықтырды. Өз бетімше ағылшын тілін үйренуге кірістім. Бас кезінде курстарға барып, кейін оқулықтарды оқып, ағылшын тілін үйреніп алдым. Ағылшынды академиялық деңгейде меңгердім. Ол деңгейім сабақты толық ағылшын тілінде беруге жеткізді. Жалпы, әр адам үшін өзіндік жұмыс аса маңызды рөл атқарады. Жас мамандарға ағылшын тілін меңгеруді ұсынар едім. Тіл меңгеруден қашпау, қорықпау қажет. Физиканы ағылшын тілінде түсіндіруге ынтам күшейіп, Жезқазғандағы білім және инновация лицейіне жұмысқа орналасып, мол тәжірибе жинақтадым. Себебі онда сабақ 100 пайыз ағылшын тілінде өтеді. Балалардың алдына шығып, сабақ түсіндіргенде ағылшын тілімнің деңгейі сыналғанын несіне жасырайын. Жалпы, балалардан асқан психолог жоқ дегенге келісу керек. Әрі балалар әр мұғалімнің дамуына зор көмекші. Сол жылдары осыны түсіндім. Төрт жыл еңбек ету барысында көптеген жоба жасадық, біршама жетістікке жеттік. Шәкірттеріммен әлі күнге дейін хабарласып отырамыз. Одан соң Нығмет Нұрмақов мектебінде де ағылшынша сабақ берілетінін біліп, осында ауыстым. Әрі «Өзіңді өзгерту керек. Бір орында отыра бермеу қажет» деген қағидатты ұстанамын. Бір орында 15-20 жыл тапжылмай жұмыс істеу – тиімсіз. Дамуға кедергі. Оның соңы – мұғалімдіктен жалығуға әкеліп соғады. Сондықтан қызмет орнын ауыстырған жөн. Ол жаңа орта – өзіңнің жаңа қырыңды ашуға мүмкіндік береді, – дейді Ерсін.
Әлбетте, ұстаз еңбегінің көрсеткіші – шәкіртінің жетістігі. Шәкірттері республикалық, облыстық олимпиадаларда жүлделі орын алып жүргенін мектебі мақтаныш тұтады. Ерсін Бекежанұлының бір алғыр шәкірті Бексұлтан Шәріп Өзбекстанда өткен Ахмад әл-Ферғани атындағы физика пәнінен халықаралық олимпиадада қола медальді иеленді. Мұнда әлемнің 20 елінен IPhO рейтингінде көш бастап тұрған 100-ден астам оқушы бақ сынасқан еді. 20 ел арасынан физикадан суырылып шығу оңай емес. Команданың үздік бестіктің қатарынан табылуы құрамның сапасын аңғартса керек-ті. Одан бөлек, О.Жәутіков атындағы халықаралық олимпиадада жеңіске жетуі де берілген білімнің таразысы іспеттес.
Бүгінде Ерсін Н.Нұрмақов мектебінде арнайы жабдықталған шағын зертханада түрлі жобаларды жасауға шәкірттерін жұмылдырып келеді. Мақсаты – шәкірттерінің халықаралық білім додасында бақ сынап, оза шабуына мүмкіндік беру.
– Біз, мұғалімдер – ұйымдастырушы ғанамыз. Баланың қабілет-қарымын байқап, оның дамуына ықпал етеміз. Ал баланың биіктерден көрінуінде мектептің, ата-ананың, ұстаздың бірлескен еңбегі бар. Ол – тек ұстаздың жеңісі деп кесіп айтуға болмайды, – дейді Ерсін Бекежанұлы.
Осы оқу жылында білікті ұстаздың қабілет-қарымын аңғарған басшылық Ерсін Бекежанұлын директордың тәрбие ісі жөніндегі орынбасары етіп бекітті. Мектеп ұжымы Ерсіннің ізденімпаздығы мен еңбекқорлығын ерекше айтады.
– Ерсін – жас та болса, білімімен топ жарған, шәкірттерінің алды халықаралық байқауларда жүлделі орын алып жүрген ұстаз. Еңбек жолы он жыл ғана, бірақ республикалық, халықаралық деңгейде жетістікке жетуі – оның дарыны мен талантын айғақтаса керек, – дейді мектеп директоры Сейфүлмәлік Сұлтанов.
Қарағанды облысы
