Зейнет жасына жақындап қалса да, Шахноза Асилина екі өкпесін қолына алып, мектепте зыр жүгіріп жүреді. Оның жарқын шыққан дауысы дәлізде кетіп бара жатқан адамды селт еткізбей қоймайды. Бар ынта-шынтасымен беріліп, оқушыларының санасына білім нұрын құйып жатқан ұстаздың мамандығына деген адалдығына разы болмау мүмкін емес.
«Расында, «Басқаларды үйрете отырып, өзіміз де үйренеміз» деген сөзді Сенека текке айтпағаны даусыз. Әрбір оқушымен жеке жұмыс істеген ұстаздың ісі алға басады. Өйткені әр бала – жеке бір әлем, бөлек психология. Оқушының ішкі әлеміне үңілсең ғана болмысымен таныса түсесің. Нашар ұстаз болуы мүмкін, бірақ жаман оқушы болмайды. Оның оқуға деген зейінін, білімге деген құштарлығын ашу жолында ұстаздар жаңа әдістемелік тәсілдерді сәтімен пайдаланғаны жөн. Мұғалім жаңашылдыққа ұмтылмаса, оқу процесі кезінде білім алушылардың қызығушылығын оята алмаса, бәрі бекер», дейді ол.
Бүгінде алпыстың асқарына шыққан ұстаз кезінде Ресейдің Тамбов мемлекеттік институтында орыс тілі пәнінің мұғалімі мамандығы бойынша білім алған. 1985 жылы жоғары оқу орнын аяқтаған ол өзі түлеп ұшқан Ақыртөбе ауылына келіп, ауыл балаларына сабақ береді. 1987-1990 жылдары аудандық комсомол комитетінің ІІІ хатшысы, 2003-2013 жылдар аралығында Құлан ауылындағы Шоқан Уәлиханов атындағы орта мектепте директордың оқу ісі жөніндегі орынбасары қызметін абыроймен атқарды. Қазіргі таңда аталған мектепте орыс тілі мен әдебиеті пәнінің мұғалімі ретінде еңбек жолын жалғастырып жүр.
Білім саласында 35 жылдан астам уақыт бойы үздіксіз еңбек етіп келе жатқан ұстаздың мақсаты да айқын. Ол жұмысына шығармашылық ізденіспен қарағанды мақұл көреді. Сол арқылы балалардың арасында да шығармашылық орта қалыптастыруға күш салып келеді. Көптеген интеллектуалдық жобаға қатысып, үздіктердің қатарынан көрінген ұлағатты ұстаз қарапайым қалпынан танған емес. Алайда қарапайымдылық қарабайырлық емес. Өйткені ізденген адам мұратына жететінін, жалқаудың кері кететінін жақсы біледі.
Мейірімді мұғалімнің «Білім сапасын арттыру: жаңа идеялар, жаңа тәсілдер» тақырыбында өткен конференцияға әзірлеген еңбегі ғылыми жинаққа енсе, бірер жыл бұрын тағы бір жазбасы халықаралық «Мир учителя» порталында жарияланып, мамандар тарапынан қызу талқыға түсті. Мұғалімнің еңбегі еленіп, үздік ұстаз ретінде арнайы марапаттарға да ие болды.
Айта берсек, Шахноза Асилинаның қол жеткізген жетістіктері аз емес. Үздік ұстаздар арасындағы ірі байқауларда сан мәрте топ жарды. Қазақ және орыс тілдерінде жарық көретін республикалық, халықаралық және салалық басылымдарда көптеген ғылыми еңбегі жарияланып, кей жағдайда жазбалары үшін түрлі дәрежеде марапатталды.
Отыз жылдан астам еңбегінің еленгені шығар, бірер жыл бұрын бұрынғы Білім және ғылым министрлігі білім және ғылым саласындағы жеткен табысы үшін ұлағатты ұстазды Ыбырай Алтынсарин атындағы төсбелгімен марапаттады.
«Оқушыларымның бәрін мақтан тұтамын. Олардың бірі озды, бірі көштен қалып жатыр деуге болмайды. Өйткені адам баласы кез келген сәтте өзін басқа қырынан көрсетуі ықтимал. Жалпы, мұғалім біткен ұстазға ұстаным, балаға мейірім керек екенін қаперден шығармаса деймін. Үйінде ата-анасының, мектепте ұстаздарының мейірім-қайырымына қанығып өскен оқушыдан жаман азамат шығуы мүлде мүмкін емес», дейді Шахноза Асилина.
Жамбыл облысы,
Тұрар Рысқұлов ауданы
