Байқауға Орталық Азия мен Әзербайжаннан 360-тан астам жұмыс ұсынылды. Іс-шараның қорытындысы бойынша Қазақстан «Жыл мемлекеті» атанды. Бұл атақ халықаралық қазылар алқасының дауыс беру нәтижелері бойынша ең көп ұпай жинаған елге беріледі. Әзербайжанның Endorphin компаниясы «Жылдың ең үздік агенттігі» деп танылды. Қазақстан атынан қатысқандарға – 50, Өзбекстанға – 24, Әзербайжанға 13 марапат тапсырылды.
– Red Jolbors-та біз әрқашан саланың ең қызықты және өзекті мәселелерін көтереміз. Жарнамалық агенттіктердің өкілдері және аймағымыздың маркетологтеріне тәжірибемізді бөлісуге үздік сарапшыларды жинауға тырысамыз. Биылғы байқаудың спикерлері мен қазылар алқасы жарнама және маркетинг саласындағы ең беделді марапаттардың иегерлері болды, – деді Red Jolbors негізін қалаушы Сабина Рейнгольд.
Дәрістердің, сондай-ақ панельдік пікірталастардың спикерлері ірі жарнама агенттіктерінің, Еуропа, Оңтүстік Корея, Грузия, Қазақстан, Қырғызстан, Өзбекстан, Ресей компанияларының өкілдері болды. Олар өздерінің тәжірибелерін әңгімелеп, шығармашылық идеяларды әзірлеу, маркетинг құралдарының тиімділігі, брендтердің өсу мүмкіндіктері, серіктестік құру, цифрлық дизайннан кейінгі дизайн, маркетингтегі метаверстер, TikTok-қа миллиондаған аудиторияны тарту туралы айтты. Сондай-ақ Red Jolbors-тың 2022 жылғы негізгі тақырыптарының бірі өмір сүріп жатқан ортаны жақсы жаққа өзгертетін ESG жобаларын құру және дамыту төңірегінде болды.
Сонымен қатар іс-шарада үш түрлі панельдік пікірталас ұйымдастырылды. Олардың бірі Орталық Азия елдерінде креативті экономиканы дамытуға арналды. Оған Ақпарат және қоғамдық даму вице-министрі Александр Данилов қатысты.
– Қазір Қазақстан мен оның мемлекеттік органдары бизнес және қоғаммен өзара іс-қимылға ашық. Маңызды қоғамдық мәселелерді шешу үшін біз шығармашылық салалардың, креативті индустрия өкілдерін тарта отырып, ортақ күш салуымыз керек. Өзара ынтымақтасу арқылы біздің одан әрі дамуымызға үлкен мүмкіндіктер пайда болады, – деп атап өтті А.Данилов.
Red Jolbors – шығармашылық, коммуникациялық және жарнама агенттіктерінің, өндіріс және дизайн студияларының өкілдері, маркетологтер, бренд менеджерлері, PR мамандары, жарнама және маркетинг саласының мамандары үшін жылдың ең ірі оқиғаларының бірі. Red Jolbors миссиясы – шығармашылық индустрия өкілдерінің кәсіби қауымдастығын құру және дамыту. Фестиваль әу баста Қырғызстанда құрылды, ал 2018 жылдан бастап жыл сайын Қазақстанда өтеді.
