Өңірде жедел респираторлы вирустық инфекциялар (ЖРВИ) және тұмау бойынша ахуал тұрақты деп есептеледі. Былтыр дәл осы кезеңде ауырғандардың саны мыңнан асып кетсе, биылғы көрсеткіш сәл азырақ. Әрі ЖРВИ диагнозы әзірше ешкімге қойылмаған. Павлодар облыстық денсаулық сақтау басқармасының бастапқы медициналық-санитарлық көмек көрсету және емдеу жұмысы бөлімінің басшысы Айгүл Мұқышева жедел респираторлық аурулар бойынша алаңдатарлық жағдай жоқ екенін айтады.
– Негізі тұмау Ұлттық сараптама орталығының вирусология зертханасының зерттеуінен соң ғана айқындалады, ал оны нақтылау шарасы елордадағы зертханада жүргізіледі. Былтыр эпидемиялық кезеңде өңірде 13 тұмау жағдайы аталған зертханалармен расталды. Алдағы уақытта, нақты түрде желтоқсан айының басында өңірде вирустық инфекциялар көбейіп, тұмау бой көрсететіні анық. Себебі күн суытқанда оның таралатын кезеңі басталады. Сондықтан денсаулық сақтау жүйесі тұмау мен тұмау тәріздес аурулардың алдын алуға көңіл бөлуде. Жылдағыдай көпшілікті вакциналаудан өткізу және бұл шараға аймақтағы медицина ұйымдарын даярлау жұмыстары пысықталып қойды, – дейді А.Мұқышева.
Қазіргі күні облыста тұмауға қарсы екпе салу басталып кетті. Биыл біздің өңірге 90 мың доза вакцина бөлініпті. Өңірлік санитарлық-эпидемиологиялық бақылау департаменті паразитарлы және инфекциялық ауруларды эпидемиологиялық бақылау бөлімінің басшысы Гүлмира Құлмағамбетованың сөзіне сүйенсек, барлық аудан-қаладағы емдеу мекемелерінде медициналық кабинеттер әзірленген. Тұрғындар жұмыс күндері қалаған уақытында келіп екпе салдыра алады. Жылдағыдай ресейлік өндірістен шыққан «Гриппол Плюс» вакцинасы егіледі. Бұл екпеден соң адам бойында белгілі бір аурулардың қозуына қатысты деректер тіркелмеген, ал препараттың тиімділігі жоғары, дейді маман.
Емханаларға өз еркімен тұмауға қарсы екпе салдыруға келетіндердің басым бөлігі зейнеткерлер екен. Иммундық жүйесінде кінәраты бар егде жастағы емделушілерге елдің алды болып вакцина салынады. Әсіресе онкологиялық, қант диабеті, тыныс алу жолдары және қан айналым жүйесі ауруларына шалдыққандарға зор көңіл бөлінеді.
Павлодар қаласының №5 емханасында тұмауға қарсы егу шаралары қыркүйек айынан басталып кетті. Бас дәрігердің медицина қызметі сапасын бақылау жөніндегі орынбасары Айгүл Абылхасан бүгінде 1 мың адамға вакцина салынғанын жеткізді. Бұл емдеу ұйымына жалпы саны 55 919 адам бекісе, мұнда бөлінген вакцина саны – 7 372 доза. Негізінен тегін екпені медицина қызметкерлері, диспансерлік есепте тұрған балалар, 60 жастан асқан қариялар, жүкті әйелдер, қарттар үйлерін мекендеушілер мен мүгедектер, балалар үйлерінің тәрбиеленушілері қабылдауда.
– Ал шаһардағы 51 750 емделушісі бар №3 емханада қазірдің өзінде 2 023 адамға салынып үлгерген. Жыл соңына дейін жалпы саны 5 677 адамды екпемен қамтымақ жоспарымыз бар, – деп хабарлады мекемедегі эпидемиолог көмекшісі Ақбота Асылханова. – 2021 жылы мұнда 10 мың адам тұмауға қарсы вакциналаудан өткен. Екпе алғандар арасында тұмаумен ауыру диагнозы тіркелмеген.
Мамандар тұмаудың жұқпалы ауру екенін ескертеді. Онымен үлкен де, кіші де ауырады. Адамдар көп жиналатын жерлерде, үлкен қалалар мен елді мекендерде тез тарайды. Бұл жұқпалы дерттің мұрын мен тамақтан өзге өкпеге зақым келтіретін түрлері де болады. Асқынған жағдайда құлақ инфекциясына немесе бактериялық пневмонияға соқтыруы мүмкін.
Павлодар облысы
