Екі ел арасындағы алыс-берісті арттыруға тағы бір қарышты қадам жасалды
Достық арқауына негізделген қарқынды қарым-қатынас қашанда зор жетістіктерге жетелеп, игі шарапатын тигізетіні хақ. Осындай ынтымақты берік байланыс іргемізде жатқан Қытай елімен жыл өткен сайын нығайып, барыс-келіс көбейіп, сауда-саттық ұлғайып келеді. Бұл орайда, бұдан бұрын хабарланғанындай, Қазақстан Республикасының Президенті Нұрсұлтан Назарбаевтың Қытай Халық Республикасына мемлекеттік сапары барысында Ляньюньган теңіз портындағы бірінші Қазақстан-Қытай көлік-логистикалық терминалы кешенін іске қосу салтанатты рәсімі болып, онда телекөпір өткізілді. Елбасы Нұрсұлтан Назарбаев пен ҚХР Төрағасы Си Цзиньпин Қытайдың шығыс жағалауындағы алғашқы бірлескен логистикалық жоба қызметінің ашылуын бастап беріп, сәт сапар тіледі. Сөйтіп, екі елдің сенімді серіктес екендігі нақты іспен дәлелденді. Аумағы 21,6 гектарға есептелген логистикалық кешеннің құрылысын 2014 жылдың соңына дейін толық аяқтау жоспарланып отыр.
«Қазақстан темiр жолы» ұлттық компаниясы мен Ляньюньган портының бірлескен инвестициялары 100 млн. АҚШ долларын құрайды. Ляньюньган порты трансқұрлықтық транзиттік дәліздің шығыс жағалауындағы теңіз қақпасы ретінде Қазақстанмен тікелей теміржол қатынасы арқылы тығыз байланыста.
Ляньюньган портында терминалдың іске қосылуына байланысты, «Қазақстан темiр жолы» ұлттық компаниясы Оңтүстік-Шығыс Азия елдерінен Орталық Азия, Кавказ, Ресей, Еуропа және Парсы шығанағы елдері бағытына, сондай-ақ кері бағытқа жол тартатын жүктерді шоғырландыру және қайта өңдеу есебінен логистикалық қызметтер ауқымын кеңейту мүмкіндігін алады.
Бірлескен жоспарларға сәйкес, терминал арқылы контейнерлерді тасымалдау көлемі 2015 жылы 250 мың контейнерден астам деңгейге жетеді немесе 2020 жылға қарай кейіннен 2 есе ұлғайту арқылы 3 миллион тонна жүкті құрайды. Сөйтіп, аталған жоба Қазақстан Республикасының транзиттік және экспорттық әлеуетін айтарлықтай көлемде өсіріп, қазынаға қомақты қаржы құяды. Сәтін салса, тасымал тасқындап, талай асулардан асатынымыз анық.
Марат АҚҚҰЛ,
«Егемен Қазақстан».
«Қазақстан темiр жолы» ұлттық компаниясы мен Ляньюньган портының бірлескен инвестициялары 100 млн. АҚШ долларын құрайды. Ляньюньган порты трансқұрлықтық транзиттік дәліздің шығыс жағалауындағы теңіз қақпасы ретінде Қазақстанмен тікелей теміржол қатынасы арқылы тығыз байланыста.
Ляньюньган портында терминалдың іске қосылуына байланысты, «Қазақстан темiр жолы» ұлттық компаниясы Оңтүстік-Шығыс Азия елдерінен Орталық Азия, Кавказ, Ресей, Еуропа және Парсы шығанағы елдері бағытына, сондай-ақ кері бағытқа жол тартатын жүктерді шоғырландыру және қайта өңдеу есебінен логистикалық қызметтер ауқымын кеңейту мүмкіндігін алады.
Бірлескен жоспарларға сәйкес, терминал арқылы контейнерлерді тасымалдау көлемі 2015 жылы 250 мың контейнерден астам деңгейге жетеді немесе 2020 жылға қарай кейіннен 2 есе ұлғайту арқылы 3 миллион тонна жүкті құрайды. Сөйтіп, аталған жоба Қазақстан Республикасының транзиттік және экспорттық әлеуетін айтарлықтай көлемде өсіріп, қазынаға қомақты қаржы құяды. Сәтін салса, тасымал тасқындап, талай асулардан асатынымыз анық.
Марат АҚҚҰЛ,
«Егемен Қазақстан».
