Рас, Павлодарға олимпиадалық спорт түрлерімен айналысуға қажетті мұндай кешен керек-ақ. Бұл туралы талай мәрте айтылды да. Бізді Мемлекет басшысының жұртшылық көтерген осынау бастамаға назар аударып, қолдау білдіргені қуантты. Демек арманымыздың орындалар күні алыс емес деген сөз.
Жалпы, Павлодар облысы – қысқы спорт түрлерін дамытуға қолайлы аймақ. Жергілікті жастар да қысқы спорт түрлеріне бейім. Әсіресе соңғы жылдары жастар тарапынан қызығушылық көбейді. Сондықтан заманауи мұз сарайының қажеттілігі туындап отыр. Мемлекет басшысы да мұндай кешеннің маңызы зор екенін ескертті.
Расында да, спортшылардан медаль күту үшін алдымен оларға лайықты жағдай жасау керек. Біз күткен мұз сарайы іске қосылса, Павлодар өңірінен Олимпиада чемпиондары мен жүлдегерлерінің көптеп шығарына сенемін.
Атап өтерлігі, Мемлекет басшысы елдегі, оның ішінде өңірлердегі спорттың дамуына ерекше көңіл бөліп отыр. Аймақтарды заманауи спорттық инфрақұрылымдармен қамтамасыз етуге назар аударылып жатыр. Осының бәрі бізге қуаныш сыйлайды.
Спорт – ұлттың саулығы. Сондықтан бұған атүсті қарауға болмайды. Біз спортты дамыту арқылы дені сау ұрпақ қалыптастырамыз.
Людмила ПРОКАШЕВА,
конькимен жүгіруден Нагано Олимпиадасының қола жүлдегері
Павлодар облысы