Қоғам • 07 Қазан, 2022

Журналистер арасындағы жарыс

167 рет
көрсетілді
1 мин
оқу үшін

Халықаралық Тараз иннова­циялық институтының ұйытқы болуымен Халық жазушысы Шерхан Мұртазаның 90 жылдық мерейтойына орай бильярдтан БАҚ өкілдері арасында турнир ұйымдастырылды. Бұл додада жас журналистер мен ардагер журналистер екі санат бойынша топқа түсті.

Журналистер арасындағы жарыс

Бильярдтің еркін пирамида деп аталатын түрі бойынша өткізілген доданың ашылу салтанатында сөз сөйлеген оқу ордасының президенті, об­лыстық мәслихаттың депутаты Ерболат Сау­рықов турнир жыл сайын дәстүрлі түрде ұйым­дас­тырылатынын тілге тиек етті.

Тілшілер арасындағы турнир тар­тысқа толы жағдайда өтті. Жарыс қор­тындысында көптеген ірі додада жүлделі орындардан көрініп жүрген Шу аудандық «Шу өңірі» газетінің бас редакторы Ерғали Қартайған кезекті мәрте өзінің шеберлігін дәлелдеп, жеңістің ең биік тұғы­рынан көрінді. Екінші орын облыстық дене шынықтыру және спорт басқармасының бас­­­пасөз хатшысы Серік Тәжі­бай­ға бұйырса, жас журналист Самат Сатылғанов үздік үш­тікті түйіндеді. Ардагерлер ара­сын­дағы са­йыста белгілі жур­на­лист, Қазақстан Жа­зушы­лар ода­ғының мүшесі Бекет Мо­мын­құлдың асығы алшысынан түсті.

Турнир барысында үздік ойын өрнегін көрсеткен жүл­дегерлер мен өзге де журналистер қауымы арнайы қаржылай сыйлықпен марапатталды. Осылайша, өңірдегі жалғыз же­­кеменшік жоғары оқу орны Шер­ағаның мерей­тойын елеусіз қалдырған жоқ. Дәл осы білім ордасында «Шерхантану» ғылыми-зерттеу орталығы жұмыс істеп тұрғанын айта кеткен жөн. Қазан айының соңында өтетін Шерағаның мерейтойында Халық­аралық Тараз инновациялық институтына Шерхан Мұртазаның есімі берілмек.

 

Тараз