Алты мыңға жуық жанкүйер тамашалаған Астанадағы кездесудің алғашқы кезеңі тең есеппен аяқталды. 7-минутта Никита Михайлис ҚХЛ-дің осы маусымындағы бірінші шайбасын соғып, «Барысқа» басымдық сыйлады. Дегенмен, 19-минутта сан басымдығына ие болған қонақтар үзіліске дейін таразы басын теңестіріп кетті – 1:1. Голдың авторы – Павел Махановский.
Екінші кезеңде «Барыс» ойыншылары қарқынын арттырып, қонақтар қақпасына жауапсыз үш шайба енгізді. Алдымен 26-минутта Аңсар Шайхмедденов «Барысты» қайтадан есепте алға шығарса, арада бір минут өткенде Юрий Сергиенко мен Линден Вей мергендігімен көзге түсіп, таблодағы көрсеткішті 4:1-ге жеткізді. Ал үшінші кезең басталған бетте Егор Петухов дәлдік танытып, ойынның нүктесін қойды –5:1.
Осылайша, қатарынан екі ойында жеңіске жеткен «Барыс» «Шығыс» конференциясының турнир кестесіндегі жағдайын жақсартып алды. Жерлестеріміз келесі кездесуін бүгін «Батыс» конференциясында төртінші орында тұрған Нижний Новгородтың «Торпедосымен» өткізеді.
