Бұл еңбекті аталған институттағы Деректану, тарихнама және отан тарихы бөлімінің жетекші ғылыми қызметкері, ғалым Сейітқали Дүйсен мен институт директорының орынбасары, педагогика ғылымдарының кандидаты Жабай Қалиев бірлесіп жазған. Онда белгілі мемлекет және қоғам қайраткерінің өмірі мен қызметі нақты деректермен өріліп, танымал тұлғаның туған жері, өскен ортасы және еңбегі мен өмірдегі қарапайым бейнесі жан-жақты қамтылған. Кітапқа жазған алғысөзінде тарих ғылымдарының докторы, профессор Ғани Қарасаев жинақ авторларының ізденісін айрықша атап, тарихи танымдық бағытта жазылған бұл еңбекті тұлғатануға қосылған бір үлес деп бағалаған.
Сабыр Ниязбеков – қазіргі Ақмола облысы Астрахан ауданының Өрнек ауылында өмірге келіп, алғашқы еңбек жолын 16 жасында ауылдық кеңестің хатшылығынан бастап, Ақмола, Қарағанды, Қостанай, Оңтүстік Қазақстан, Солтүстік Қазақстан, Батыс Қазақстан, Жамбыл және Алматы облыстарында жауапты қызмет атқарып, сол өңірлердің әлеуметтік-экономикалық дамуына зор үлесін қосты. Сондай-ақ 1965-1978 жылдары Қазақ КСР Жоғарғы Кеңесі Төралқасының төрағасы және КСРО Жоғарғы Кеңесі Төралқасы төрағасының орынбасары болды.
Мазмұнды іс-шара аясында Мемлекет тарихы институтының директоры, тарих ғылымдарының докторы, профессор Еркін Әбіл сөз алып, жаңа кітап туралы тағылымды ой қозғаса, Сабыр Біләлұлының туған ағасы Рахметтің қызы – Назым апамыз жинақ авторларына алғысын айтып, жылы лебізін білдірді. Сонымен бірге отырыста Л.Н.Гумилев атындағы Еуразия ұлттық университеті тарих факультетінің деканы, тарих ғылымдарының докторы, профессор Тілеген Садықов, Мемлекет тарихы институты директорының орынбасары, тарихшы ғалым Бүркіт Аяған, ардагер ұстаз Оспан Сүлейменұлы және тағы басқа зиялы азаматтар сөз алып, кітапқа кейіпкер болған тұлғаның қайраткерлігі мен жинақтың жаңалығы жайындағы ой-пікірлерін ортаға салды.
