Бас ұйым өкілімен сұхбат құрды

Кеше Қазақстан Республикасы Парламенті Сенатының Төрағасы Қасым-Жомарт Тоқаев Астана экономикалық форумына қатысу үшін Қазақстанға келген БҰҰ Бас хатшысының орынбасары, БҰҰ Бас хатшысының Шығыс Тимор жөніндегі Арнаулы кеңесшісі Ноэлин Хейзермен кездесті, деп хабарлады Сенаттың баспасөз қызметі. Қазақстан мен БҰҰ-ның өза­ра іс-қимылының ауқымды мәсе­лелері, оның ішінде БҰҰ-ның Мыңжылдықтардың даму мақ­саттарына қол жеткізуі, орнықты даму, ЭКСПО-2017 және 2015 жы­лы Әлемдік және дәстүрлі дін­дер көшбасшыларының съезін өткізу секілді тақырыптар тал­қыланды. Қ.Тоқаев БҰҰ-ның Азия мен Тынық мұхитқа арналған Эко­номикалық және әлеуметтік ко­миссиясының Атқарушы хатшысы ретінде Қазақстанмен табысты ынтымақтастығы үшін Н.Хейзерге ризашылық білдірді. Сол күні Қ.Тоқаев ЮНКТАД/ДСҰ Халықаралық сауда орталы­ғы­ның Атқарушы директоры Аранча Гонсалеспен кездесті. Ол Қа­зақстандағы шағын және орта биз­нестің халықаралық бәсекеге қабі­леттілігін арттыруға Орталықтың жәрдемдесу ниеті туралы хабардар етті. Оның пікірінше, Қазақстан экономикасы табысты дамып келеді және атап айтқанда, ауыл шаруашылығы өнімдерін өңдеу және қызмет көрсету секторын дамыту арқылы одан әрі әртараптандыруда тамаша мүмкіндіктерге ие. Сенат Төрағасы Мемлекет бас­шысы Н.Назарбаевтың эконо­микалық дамуды ынталандыру туралы бастамасы, оның ішін­де шағын және орта бизнесті, ин­фрақұрылымды және басқа да маңызды бағыттарды дамыту үшін Ұлттық қордан 1 триллион теңге бөлінетіні жайында айтты. Палата басшысы атап өткендей, алдағы уақытта капиталға рақымшылық жасау, сондай-ақ, бірқатар басқа да заңдарды қабылдау Қазақстандағы экономикалық реформаларға сер­пін береді. Қ.Тоқаев Қазақстанның Халықаралық сауда орталығымен ж­емісті ынтымақтастығына, атап айтқанда, Орталықтың ЭКСПО-2017 халықаралық көр­ме­сі­не әзір­лігі мен өткізуге қатыса­ты­нына сенім білдірді.