Суретті түсірген Дмитрий ЕРОФЕЕВ
Жалпы, Бесқайнар ауылында 152 түтін бар. Бұл – Көксу ауданы бойынша көгілдір отынға қосылып жатқан төртінші ауыл. 18 қазан күні тағы 3 ауыл (Жамбыл, Мәмбет, Амангелді) газбен қамтылды. Жыл соңына дейін тағы 4 ауылға газ тартылса, 12 ауылдың жобалық-сметалық құжаттары дайын болады. Келесі жылы тағы 12 ауылға газ тартылмақ. Осылайша, аудандағы барлық ауылды газдандыруды жоспарлап отыр.
Жетісу облыстық энергетика және тұрғын үй-коммуналдық шаруашылығы басқармасының басшысы Ернат Бәзіл: «Қарапайым халыққа ең алдымен жылу, таза су керек. Осыған орай өңірге газ тартылды. Жетісу өз алдына облыс болғаннан кейін облыс әкімінің тапсырмасымен қанша ауылға газ тарту керектігін тексердік. Нәтижесінде, 192 ауыл газға қосылу керектігі анықталды. Биыл бізде 22 жоба басталды. Оны келесі жылы аяқтаймыз деп жоспарлап отырмыз. 28 жобаның сметалық-құжаттары дайын», дейді Е.Бәзіл.
2025 жылға дейін Қаратал, Көксу, Кербұлақ, Ескелді аудандары мен Текелі және Талдықорған қаласы толықтай көгілдір отынмен қамтылмақ. Осы ретте газды үйіне мемлекет тарапынан тегін қосқан көпбалалы ана Бибігүл Көбегенова қуанышын жасырмады.
«Осы үйде 1978 жылдан бері тұрамыз. Күйеуімнің қайтыс болғанына 22 жыл болды. 10 жылдан кейін үлкен қызым өмірден өтіп, артында үш бала қалды. Отбасымызда 2 мүмкіндігі шектеулі адам бар. Жалпы, 11 адам тұрамыз. Бұрын біз көмір тасып, ағаш кесетінбіз», деді Б.Көбегенова.
Айта кетейік, ауданда газға қосылу жұмыстарының құны – 170 мың теңге. Сондай-ақ «Жетісуоблгаз» ЖШС-нан материалдар мен газ қазандығын 10 айға дейін бөліп төлеу және халықтың әлеуметтік осал топтары үшін «BSP GROUP LTD» ЖШС-нан 20%-ға дейін жеңілдіктер қарастырылған. Газға қосуды «ST LTD», «ST GAZ», «CК МУСЛИМ», «АЯКС-78» және «СҰҢҚАР-2002» ЖШС-тары жүргізеді.
Жетісу облысы
