Елімізден Қытайға 100 мың тонна бидай экспортталады

АСТАНА. 23 мамыр. Қазақстан мен Қытай арасында бидай саудасына қатысты келісім жасалды. Бұл туралы «Қазақстан жаңалықтары» хабарлады. Қытай 2014-2015 жылдары аралығында елімізден 100 мың тонна бидай сатып алады. Бұл келісімге «ҚазАгро» Ұлттық басқарушы холдингі» акционерлік қоғамының басқарма төрағасы Дулат Айтжанов пен Қытайдың КОФКО ұлттық компаниясының вице-президенті Цзинтао Чжи Мемлекет басшысының 19-20 мамыр аралығында Қытайға барған ресми сапары аясында қол қойды. Сондай-ақ, екі ел өкілі үшінші елдерге транзитті сауданы жүзеге асыру үшін бидай терминалының құрылысын бірлесе қаржыландыру мәселесін қарастырды. «ҚазАгро» Ұлттық басқарушы холдингі» акционерлік қоғамының басқарма төрағасы Дулат Айтжанов: «Қытай қазақстандық бидай мен басқа да дәнді және майлы дақылдар үшін маңызды стратегиялық нарықтардың бірі болып табылады. Қол қойылған еелісім – екі ел арасында бидай жеткізу саласында тұрақты сауда қатынастарын реттеудегі алғашқы қадамдардың бірі», – деді. Жолдыбай Базар. Дереккөз: «Қазақстан жаңалықтары». Фото: elevatorist.com.