Тоқсан ауыз сөздің тобықтай түйіні – бұл күндері танымал қылқалам шеберлері Алпысбай Қазығұлов, қырғыз суретшісі Жәнібек Бердікеев пен өзбек суретшісі Нодир Бобомұрадовтың туындылары Алматыдағы «Almaty Resort» шипажайында ашылған көркемсурет галереясынан орын алды. Түркі әлемінің үш заманауи өкілі, бейнелеу өнері майталмандарының туындылары Қазақстан, Қырғызстан, Өзбекстанда ғана емес, АҚШ, Жапония, Ұлыбритания, Түркия, Қытай мен Бельгия мұражайларында да менмұндалап тұр.
Қарап отырсақ, Еуропадағы шипажайларда мұндай көрмелер өтіп тұрады. Бұл ем алуға, демалуға келген жандар үшін таптырмайтын әрі уақыт үнемдейтін тамаша мүмкіндік. Ал Алматыдағы шипажайдың жоғары қабатын түгел алып жатқан алғашқы көрмені ұйымдастыруға әлемдік бейнелеу өнеріне қосқан үлесі үшін Еуропа өнер одағының сыйлығын алған, Қазақстан Суретшілер одағының мүшесі Алпысбай Қазығұлов ұйытқы болды.
– Менің туындыларымды түсіну үшін көрерменге уақыт керек. Шипажайда демалушыларда бұл мүмкіндік бар. Ал Өзбекстан, Қырғызстан суретшілерінің картинасында идея айқын, түсінікті және жан жадыратады. Сондықтан галереядағы туындылар өзара үйлесім тауып тұр. Сальвадор Дали айтқандай, суретші ретінде жетіле беруден қорықпау керек, бәрібір өнердің түбіне жетпейсің. Ал суретшіге қарапайым шыншылдық және өз идеяларыңа сатқындық жасамау керек деп есептеймін. Мен өзімді 45 жыл бойы іздедім, бейнелеу өнеріндегі өз қолтаңбамды қашап шығару үшін осынша жыл іздендім, бастапқыда натура салатынмын, қазір бәрі жүрегімнен шығады.
– Суретшіге өз еркіндігі мен азаттығын сақтап, сұранысқа да ие болуы үшін не қажет?
– Бірде тапсырыспен 20 күн тапжылмай натюрморт салғаным бар, алайда ол тапсырыс иесіне ұнамағаннан кейін, өзіме қалдырдым, бірақ өзіме ұнады. Бұлай жұмыс істеген өте қиын, тапсырыс берушілердің әйтеуір бірдеңеге көңілі толмайды, еркіндігіңді шектейді, бояуын қалыңдатқысы келеді. Портрет салғызса, көзімді үлкейт, көйлегімді өзгерт деген сияқты талаптар қоя бастайды. Мен бұлай жұмыс істей алмаймын, өнерден табыс табу үшін жәдігер жинаумен айналысамын. Өз идеяларыңа адал болып қалу үшін кез келген тығырықтан шығуға болады, – дейді танымал импрессионист Алпысбай Қазығұлов.
Биыл 55 жылдығын атап өтетін Almaty resort шипажайында салтанат құрып тұрған көрмеге осы бастамаға ұйытқы болған мэтрдің таңдауымен, бейнелеу өнерінің белді өкілдерінен бөлек, жас суретшілердің де жұмыстарына да орын берілді.
АЛМАТЫ