«Қоғамдық пікір» ғылыми-зерттеу институты жүргізген әлеуметтік сауалдамаға сәйкес, сұрақ-жауапқа қатысқан қазақстандықтардың 73,1 пайызы «2022 жылдың 20 қарашасында өтетін президент сайлауына барамын» деп жауап берген. Бір шешімге келмеген респонденттердің үлесі 15,9 пайызды құрайды. 9,7 пайызының дауыс беруге ниеті жоқ. Респонденттердің 1,3 пайызы сұраққа жауап беруге қиналған.
Ал қатысушылардың 76,1 пайызы сайлаудың әділ өтетініне сенім білдірді. Дәлірек айтсақ, 48,3 пайызы «нақты әділ өтеді» деп жауап берсе, 27,8 пайызы «әділ өтуге тиіс» деген пікір білдірген. Президенттікке кандидаттың бойында қандай қасиеттер болуы керек деген сұраққа: «әдептілік, адалдық, жоғары білімділік, қазақстандықтар арасындағы беделі жоғары болуға тиіс» деген жауаптар түскен.
«Қоғамдық пікір» ғылыми-зерттеу институты әлеуметтанулық зерттеуді биыл 6-10 қазан аралығында жүргізді. Сауалдамаға 17 облыс пен республикалық маңызы бар қалалардан (Астана, Алматы және Шымкент) 18 жастан асқан 1 200 респондент қатысты. Зерттеуде телефон арқылы сауалдама әдісі қолданылды. Сауалдама Орталық сайлау комиссиясының 2022 жылғы 30 қыркүйектегі №ОСК-08-18/1179 хабарламасына сәйкес, ОСК-нің ресми рұқсатымен өткізілді.
Инфографиканы жасаған Амангелді Қияс, «ЕQ»
