Қазақ даласындағы бірлігі бекем, тәлімі терең берекелі де базарлы отбасыларды тауып, оларды мерейлендіре марапаттау, елге таныту, үлгі етудің маңызы зор. Қазір түрлі себепті сылтау етіп, тұрмыстық қиындыққа төтеп бере алмай, мінездегі мінмен келеңсіз жағдайларға, қайғылы оқиғаларға жол беріп қойып жатқан отбасылар аз емес. Соның салдарынан балалар да зардап шегуде. Осы орайда отбасы институтын, адамгершілікті, руханилықты нығайту, ерлі-зайыптылықтың маңызын тану, ата-аналардың бала тәрбиелеудегі жауапкершілігін арттыру, отбасылық құндылықтарды, кәмелетке толған балаларының еңбекке қабілетсіз және егде жастағы ата-аналарына қамқор болуын дәріптеу және қазақстандық отбасының жағымды имиджін насихаттау мақсатындағы «Мерейлі отбасы» ұлттық байқауының орны ерекше.
Маңғыстауда жыл сайын аталған байқауға қатысуға ниеттілер саны артып келеді. Бұл – жақсылықтың нышаны. Биыл сегізінші рет өткен өңірлік байқауға облыстың аудандары мен қалаларынан мұнай-газ, білім, денсаулық сақтау, өнер, кәсіпкерлік және өзге де салалардан 59 отбасы өтінім берді. Байқауға көпбалалы отбасылар мен жас отбасылар белсенді қатысты. Осылайша, байқаудың облыстық кезеңіне 14 отбасы жолдама алды. Олардың ішінде ұстаздар династиясы, өнерлі әулеттер, кәсіпкер отбасылар, ата кәсібін ұрпақтан-ұрпаққа мирас еткен еңбек әулеттері бар.
Облыстық кезеңге өткен Ақтау қаласынан – Ешмұхановтар, Көшкінбаевтар және Тоқсановтар отбасы, Бейнеу ауданынан – Себепбаевтар мен Өтежановтар, Қарақия ауданынан – Бегниязовтар мен Қонайұлы отбасы, Маңғыстау ауданынан – Ұзақбаевтар мен Тұңғатаровтар отбасы, Мұнайлы ауданынан – Ізтілеуовтер мен Мотыевтар отбасы, Түпқараған ауданынан – Жәмиевтер, Уразалиевтер және Жауыновтар отбасы – барлығы да өз өңірлеріне үлгілі үйелмен ретінде танымал. Сондықтан өздерін ұлттық отбасылық байқаудан көруге сенімді болғаны анық.
Алайда жүлде санаулы. «Мерейлі отбасы-2022» ұлттық байқауының облыстық жеңімпаздарын анықтау жөніндегі өңірлік комиссияның шешіміне сәйкес 1-орынды – бейнеулік Себепбаевтар отбасы, 2-орынды – Маңғыстау ауданынан қатысқан Тұңғатаровтар отбасы және 3-орынды Түпқараған ауданынан келген Жауыновтар отбасы иеленді. Сондай-ақ сайыстың облыстық кезеңіне қатысқан 11 отбасына лауреат атағы беріліп, жеңімпаз отбасылар бағалы сыйлықтармен марапатталды. Республикалық кезеңде Маңғыстау облысының отбасылық мерейін көтеріп, мәртебесін арттыру Себепбаевтар отбасына бұйырды.
Әулеттің үлкені Лесбай Себепбаев 1935 жылы Маңғыстау ауданы, Жыңғылды ауылында дүниеге келді. 1983 жылы қаракөл қойын өсіретін кеңшар ұйымдастыруға байланысты құрылған Сыңғырлау кеңшарында бас инженер, кейін ұзақ жылдар білім ағарту саласында еңбек етіп, Сыңғырлау ауылдық ақсақалдар кеңесінің төрағасы қызметін атқарды. Лесбай Себепбаев 71 жасында өмірден озды. Отанасы Күләш Түйешиева 1940 жылы Маңғыстау ауданының Жыңғылды ауылында дүниеге келген. «Батыр ана», он саусағынан өнер тамған ісмер, қазақтың қолөнерін қастерлеген қолөнер шебері. Зейнеткерлікке шыққаннан кейін де қазақтың ұлттық киімдерін тігуді қолға алып, тігіншілікпен айналысып келеді. Отағасымен бірге 11 баланы өсіріп, бүгінде 41 немере, 46 шөбере көріп отырған еңбекқор үлгілі отбасы. Отбасынан өрбіген балалары арасында мұнай саласының шеберлері бар, білім саласында Білім және ғылым министрінің Құрмет грамотасы және Алғысхаттарымен, «Ы.Алтынсарин» төсбелгісімен, «Ерен еңбегі үшін» медалімен марапатталған тәжірибелі ұстаздар бар. Енді бірі – мәдениет саласының кәсіби маманы ретінде өңіріміздің тарихы мен этнографиясын зерттеуге, насихаттауға атсалысып жүрген үздік қызметкер. Себепбаевтар отбасы – 11 бала, 41 немере, 46 шөбере тәрбиелеп өсіріп отырған, отбасы мүшелерінің саны 100-ге жеткен үлкен қарашаңырақ. Әулеттен 16 мұғалім, 11 жеке кәсіпкер, 7 мұнайшы, 5 эколог, 3 кітапханашы, 4 мемлекеттік қызметкер, 2 «Алтын белгі», 5 «Үздік аттестат» иегері шыққан. Қазіргі таңда немеренің үлкені 35 жастағы жеке кәсіпкер болса, шөберенің алды – 18 жастағы студент.
«Балаңды өз тәрбиеңмен тәрбиелеме, ұлтыңның тәрбиесімен тәрбиеле» деген тәмсілді ұстаным еткен отбасы үлкендерді құрметтеу және сыйлау, адамгершілікті жоғары қою, адал еңбек етуді негізгі бағыт етіп алған.
Маңғыстаулықтар ынтымағы ұйыған Себепбаевтар отбасының республикадан жүлделі оралуын күтуде. Берекелі отбасы – ұлт байлығы, мемлекет тірегі. «Мерейлі отбасы» байқауына қатысатын отбасылар санының азаймауы көңіл қуантады.
Маңғыстау облысы
