Жыл сайынғы акция 23 қазанда дүниежүзінде атап өтілетін Халықаралық қар барысы күніне орайластырылған. Дәстүрлі іс-шара әлемде өте сирек кездесетін және жойылып бара жатқан қар барысын сақтап қалу, жұртшылықтың назарын аудару мақсатында өткізіледі.
«Барыс Арена» мұз сарайының аумағында ұйымдастырылатын «Қар барысын сақтайық!» экологиялық акциясы аясында жанкүйерлер үшін тақырыптық фотоаймақ, еліміздің табиғатында түсірілген ілбістің бірегей кадрларының фотокөрмесі, арнайы сыйлықтар ойнатылатын викторина, балаларға арналған аквагрим және басқа да іс-шаралар ұйымдастырылады. Сондай-ақ матчты тамашалауға келген әрбір жанкүйер кәсіби суретшілермен бірлесіп қар барысы тақырыбында сурет салуға қатыса алады.
Қазақстан халқының басым бөлігі, өкінішке қарай, қар барысының популяциясын сақтаудың маңыздылығы мен оның жойылу себептері туралы біле бермейді. Адамдардың табиғатқа бейжай қарауы, экожүйелердің бұзылуы, браконьерлік және климаттың өзгеруі қар барысы санының қысқаруының негізгі себептері екені белгілі.
Қар барысы жойылып кету қаупіне байланысты Халықаралық табиғатты қорғау одағының «Қызыл кітап» тізіміне және жануар мекен ететін барлық 12 елдің, соның ішінде Қазақстанның да «Қызыл кітабына» енген. Бір айта кетерлігі, кейінгі 40 жылда Қазақстандағы ілбістің популяциясы шамамен 180-200-ден 135-170 басқа дейін қысқарған.
БҰҰ ДБ бірнеше жылдан бері Қазақстан Үкіметімен бірлесіп Ғаламдық экологиялық қордың (ҒЭҚ) қолдауымен қар барысының популяциясын қорғау және сақтау бастамасын іске асырып келеді. Атап айтқанда, ғылыми зерттеулер, браконьерлікке қарсы іс-қимыл, қар барысы мекендейтін орындардың қорғалуын күшейту, экологиялық ағарту, ұлттық заңнаманы жетілдіру бойынша іс-шаралар жүргізілуде.
