«Қаржыландыру ережелерін, сондай-ақ үгіт-насихат жүргізу ережелерін бұзу айтарлықтай күрделі аспекті саналады. Онда әкімшілік және конституциялық құқықтық жауапкершілік қарастырылған. Кандидаттардың штабы ереже бұзса, кандитат орнынан түсіп қалуы мүмкін», деді Орталық сайлау комиссиясының төрағасы Константин Петров.
ОСК мүшесі Сәбила Мұстафина сайлауды ұйымдастыру мен өткізуге кететін шығындарды қаржыландыру мәселесін түсіндірді.
«Сайлауды қаржыландыру – сайлауды әзірлеу мен өткізуді қаржылық қамтамасыз етуге, сайлауалды үгіт-насихат жұмыстарын қаржыландыруға байланысты сайлау іс-шараларының жиынтығы. Сайлауды ұйымдастыру мен өткiзу жөнiндегi шығыстарды қаржыландыру Қазақстан Республикасындағы сайлау туралы конституциялық заңмен реттеледi. Қолданыстағы заңнамаға сәйкес сайлауды мемлекеттік қаржыландыру және мемлекеттік емес қаржыландыру нормалары қарастырылған. Президент сайлауын қаржыландыру республикалық бюджеттен жергілікті атқарушы органдардың осы мақсаттар үшін ашылған шоттары арқылы жүзеге асырылады. Кандидаттардың сайлауалды үгіт-насихат жұмыстарының шығыстары сайлау науқандары аясында қаржыландырылады», деді С.Мұстафина.
Еске сала кетейік, 21 қазан күні сағат 18:00-де Қазақстан Президенттігіне кандидаттардың сайлауалды үгіт жұмысы басталды. Президенттікке кандидат ретінде алты адам тіркелген.
