Ресей Президенті Еуразиялық одақтың құрылуын жылдың басты оқиғасы деп санайды

АСТАНА. 26 мамыр. Кеден одағы пен Біріңғай экономикалық кеңістікке қатысушы елдердің басшылары 29 мамыр күні Астанада Еуразиялық экономикалық одақ құру туралы құжатқа қол қояды. Аталған келісімнің мән-маңызына байланысты көптеген жағымды пікірлер айтылуда. Бұл туралы egemen.kz тілшісі хабарлады. XVIII Санкт-Петербург халықаралық экономикалық форумында Ресей Президенті Владимир Путин Еуразиялық экономикалық одақ және Еуропалық одақ арасындағы қарым-қатынасты дамыту қажеттігін айта келе: «2015 жылдың 1 қаңтарында Еуразиялық экономикалық одақ заңдық тұрғыда күшіне енуі тиіс. Халқының саны 170 млн. адамды құрайтын Қазақстан, Ресей, Беларусь мемлекеттерінің ортақ экономикалық нарығы түзіледі. Бұл нарық арқылы капитал, тауар, жұмыс күші мен қызмет көрсету салалары бойынша еркін байланысқа түсеміз. Кәсіпкерлер үшін мүмкіндіктер мол болады. Сондай-ақ, бірлескен инвестициялық және кооперативтік жобаларды іске асыруға, макроэкономикалық саясат келісімдерін жүргізуге, сыртқы нарықты үйлестіруге қол жеткізіледі», – деді. Сондай-ақ, ол Еуразиялық экономикалық одақтың құрылуын биылғы жылдың басты жаңалығы деп есептейтінін атап өтті. Жолдыбай Базар. Дереккөз: egemen.kz. Фото: pia.ru.