Қазір жасы жетпістен асты. Бірақ әлі де сурет салады. Оның жеке қорында 100-ден астам картина бар. Ауылдағы орта мектепте бейнелеу пәнінен дәріс берген суретші өлең де жазады. Осы кезге дейін бес кітабы жарық көрді.
Алты жыл бұрын өзі тұратын ауылында галереясын ашып, оған 70-тен аса картинасын қойды. Суретшінің туындылары тек өз ауылына ғана емес, Түркия, Италия, Германия секілді шетелдерге танымал. Ал өзі кезінде Мәскеуде өткен бүкілодақтық шығармашылық конкурстың лауреаты атанған.
– Елордадан алыстағы елді мекендер ұлы даламыздың бір бөлшегі ғой. Менде алаңсыз жұмыс істейтін жеке шеберхана жоқ. Ұлы даламыз алып шеберхана секілді болып көрінеді, – дейді Махамбет сыйлығының лауреаты Тілек Халин.
Суретшінің арманы – қазақтың атын, өзі тұратын Бөдене ауылын әлемге таныту. Галереясын заңдастырып, шаң басқан туындыларын жұртшылыққа кеңінен таныстырғысы келеді.
– Біздің ауылдың жанында үлкен тоғай бар. Суретші сол тоғайды айнытпай бейнелеген картинасын «Талөткел» деп атаған. Галереяға келген сайын сол картинаға қарап, суретшінің шеберлігіне тамсанамын, – дейді ауыл тұрғыны Роза Сатаева.
Атырау облысы
