Қорғаныс ведомствосының басшысы қатысушыларды Ұлттық мереке – Республика күнімен құттықтады. Ол демократиялық әлеуметтік құқықтық мемлекет құруды, тәуелсіз дамуды, оның аумағының бөлінбейтіндігі мен қол сұғылмайтындығын жариялаған мемлекеттік егемендік туралы Декларацияны қабылдаудың маңызды екенін атап өтті.
Мемлекеттілікті нығайтуға, жастарды әскери-патриоттық тәрбиелеуге Қарулы Күштер мен білім беру мекемелері де өз үлестерін қосып келеді. Еліміздің Қорғаныс министрлігі мен жоғары оқу орындарының белгіленген мерзімде қызмет еткен әскери қызметшілерге тегін жоғары білім алу мүмкіндігін беру жөніндегі бірлескен жобасы да әскери қызметтің беделін арттыруға ықпал ететін болады.
– Аталған бастаманың жақсы жағы жетерлік. Бұл студенттік ортада патриотизмді нығайтуға ықпал етері анық. Біріншіден, жоғары оқу орындарына өздерін жақсы жағынан көрсетіп, мұқият іріктеуден өткендер келеді. Екіншіден, оқу орындарына баратындар – армия мектебінен өткен жастар. Мықты, төзімді, тәртіпті балалар студенттерге батылдық пен дербестіктің үлгісі болады, – деді ведомство басшысы, генерал-полковник Руслан Жақсылықов.
Елуден астам жоғары оқу орнының басшылары қол қойған келісімде ынтымақтастық бағыттары, сондай-ақ мерзімді әскери қызмет өткерген адамдарға тегін білім алу үшін жыл сайын бөлінетін орындардың саны айқындалған.
Келісімдер 2023 жылдан бастап күшіне енеді. Әскерде борышын өткерген азаматтарға білім алу жеңілдіктерін беру әскери қызметке деген ынтаны арттырары сөзсіз. Іс-шара Қорғаныс министрлігінің Орталық ансамблі дайындаған мерекелік концертпен аяқталды.
