Кездесуде кандидат жұртшылықты өзінің сайлауалды бағдарламасының негізгі бағыттарымен таныстырды. «Аян» ЖШС ұн тартумен, ұн, макарон өнімдерін өндірумен айналысады. Астана маңында пайда болған алғашқы отандық кәсіпорындардың бірі саналатын серіктестік елорданың азық-түлік белдеуіне енген. Кәсіпорын тұрақты жұмыс істейді, алайда соңғы кездегі астық бағасының күрт өсуіне байланысты белгілі бір қиындықтар туындаған. Компанияның өз алқабынан алған біршама шикізаты бар. Бірақ ол мәселені шешпейді.
– Бұл тұрғыдан келгенде мұндай кәсіпорындар нарықта арзан шикізат іздеп аласұрмай, шикізат жеткізушілерін нақты анықтап, айналасында орналасқан тауар өндірушілермен екі жаққа да қолайлы бағамен ұзақ мерзімді перспективада жұмыс істеуі керек. Өңдеу кәсіпорындары несиелерінің пайыздық мөлшерлемесін субсидиялап, оларға фермерлерден ауылшаруашылық өнімдерін арзан несиелермен сатып алатын жағдай жасауға болады. Сонда фермерлердің де, ұн тартушылардың да, ең бастысы, ұн мен нан тұтынушылардың, яғни Қазақстанның барлық азаматының мүддесі қорғалады. Біз экспортқа бағдарланған елміз, сол себепті астық бағасын тұрақтандыру мақсатында экспортты жабуға болмайды, – деді Ж.Дайрабаев.
