Еуразиялық экономикалық одақтың құрылуы барлық тарапқа тиімді

АСТАНА. 27 мамыр. Еуразия экономикалық одақ туралы келісімге қол қойылуы тарихи оқиға. Парламент Сенаты мен Ресей Федералдық Жиналысы Федерация Кеңесі Парламенттік ынтымақтастық комиссиясының бесінші отырысында Сенат төрағасы Қасым-Жомарт Тоқаев осылай деді. Бұл туралы «ҚазАқпарат» хабарлады. Қасым-Жомарт Тоқаевтың айтуынша, бір бірімен ынтымақтаса өмір сүргісі келетін үш мемлекет халықтарының мұқтажына толықтай жауап беретін экономикалық одақтың құрылуы өте маңызды. Жиында Сенат төрағасы: «Экономикалық ықпалдастықты дамыту одақтың барлық қатысушыларына ыңғайлы», – деді. Сондай-ақ, ол: «Бүгінде әлемде қызмет етіп жатқан 200 ықпалдастық бірлестіктер арасында Еуразиялық экономикалық одақ өзін мейлінше тиімді және табысты етіп көрсететініне толық негіз бар. Бірақ, ол үшін қажырлы қызмет етуге тура келеді», – деді. Кездесуде Сенат төрағасы Ұлы Отан соғысындағы Жеңістің 70 жылдығын мерекелеуге бірлесе әзірлік жасауға Қазақстан және Ресей сенаторларының назарын аударды. Жолдыбай Базар. Дереккөз: «ҚазАқпарат». Фото: egemen.kz.