Біздің делегацияны Индустрия және инфрақұрылымдық даму министрлігі Азаматтық авиация комитетінің төрағасы Талғат Ластаев бастап барды. Кездесуге «Қазақстанның авиациялық әкімшілігі» АҚ бас директоры Каталин Раду да қатысты. Еуропалық делегацияны Еуропалық комиссияның ұшу қауіпсіздігі бөлімі басшысының орынбасары Питер Соренсен басқарды.
«Кездесу барысында қазақстандық тарап ұшуды пайдалану, ұшуға жарамдылық, авиаперсоналды лицензиялау және Қазақстандағы ұшу қауіпсіздігінің деңгейін жақсарту бойынша Қазақстанның авиациялық әкімшілігінің процестерін стандарттау бөлігінде қабылданған шаралар мен іске асырылып жатқан түзету іс-қимылдарының жоспарлары туралы хабардар етті. Оның ішінде Қазақстанның авиациялық әкімшілігі қаржыландырудың жаңа тәсілін енгізу және елдегі азаматтық авиация саласын реттеудің еуропалық моделіне одан әрі жоспарлы көшу бөлігінде Қазақстан Республикасының қолданыстағы заңнамасына күтілетін өзгерістер таныстырылды. Еуропалық тарап жүзеге асырылып жатқан іс-шаралар бойынша Қазақстанның авиациялық билігі қабылдап жатқан шараларды оң қабылдады», деп хабарлады Индустрия және инфрақұрылымдық даму министрлігі.
Еуропалық комиссия делегациясының басшысы 2019 жылдан бастап Қазақстанда іске асырылып жатқан азаматтық авиацияны реттеудің еуропалық моделін жоғары бағалап қолдады және бұл ұшу қауіпсіздігінің еуропалық стандарттарына толық сәйкес келетін әлемдегі ең озық және ең тиімді тәсілдердің бірі болып саналатынын атап өтті. Сондай-ақ Қазақстанда тұрақты авиациялық реттеушінің жұмыс істеуі және елдегі ұшу қауіпсіздігін қамтамасыз ету жөніндегі міндеттемелерді орындау үшін Қазақстанның авиациялық әкімшілігі ресурстарын қаржыландыру мен қамтамасыз етудің жаңа тетігін тиімді іске асыру қажеттігі атап өтілді.
Сондай-ақ Еурокомиссия ұшуға жарамдылық, ұшуды пайдалану, әуе персоналын лицензиялау, ұшу қауіпсіздігі басқармасы, Қазақстанның авиациялық әкімшілігі процестерін стандарттау және ұйымның жаңартылған құрылымы салаларында атқарылған жұмыстардың барысын оң бағалап, осы бағыттағы жұмысты жалғастыруға шақырды. Еуропалық тарап аталған мәселелерде жан-жақты қолдау көрсетуге дайын екендігін білдірді.
Қазақстанның авиациялық билігі ұсынған прогресс негізінде Еуропалық комиссия өкілдері қазіргі күні қазақстандық авиакомпанияларда Еурокомиссияның ұшу қауіпсіздігі тізіміне («қара тізім») және Еуропаға ұшуға қандай да бір шектеулер енгізу бойынша қауіп жоқ екенін растады.
