Судьялар намысты таразылады

Қостанай қаласында Қазақстан Республикасы Судьялар одағы VII спартакиадасының  іріктеу ойындары өз мәресіне жетті. Саламатты өмір салтын қалыптастыру мақсатында өткен іріктеу ойындарының жабылу салтанатында Қостанай облыстық сотының төрағасы Ғ.Мырзаке аталған шараға белсене қатысқан командаларға алғысын айтып, жеңімпаздарды құттықтады. Елбасы Нұрсұлтан Назарбаев «Қа­зақ­стан-2030» Стратегиялық бағдар­ламасында ха­лықты саламатты өмір салтына ынталанды­руды басым бағыттың бірі ретінде атап көр­сетті. Мемлекет саясатының стратегиялық бағы­тының бірі бұқаралық спорт қозғалысын ке­ңейту аясында судьялар арасында спорт жарыстарын өткізу дәстүрге айналған. Соған орай Қазақстан Рес­публикасы Судьялар одағының спартакиадасы 2003 жылдан өткізіліп келеді. Игі шара денсаулықты жақсартумен қатар, судьялар арасындағы сый­лас­тықты қалыптастырады, олардың араласуын, достық қарым-қатынасты нығайта түсті. Күші мен ептілігін, шыныққан шымыр екенін байқататын нағыз спорт мерекесінде Қазақстан Республикасы Жоғарғы Сотының, Ақмола, Солтүстік Қазақстан, Қостанай облысы соттарының құрама командалары спорттың волейбол, мини-футбол, бильярд, үлкен теннис, үстел теннисі, шахмат, дойбы түрлері бойынша бақ сынасты. Үлкен бәйгеде озып, өңір намысын қолдан бермеген ең үздік командалар мен спортшылар анықталды. Шағын футбол мен волейболдан Қостанай облысы сотының коман­дасы бірінші орынды иеленді. Сондай-ақ, үлкен теннистен Қос­­­танай облысы­ның ма­мандандырылған аудан­ара­лық экономикалық сотының судья­сы Б.Ордабаев ешкімге дес бермеді. Үстел тен­нистен Жоғарғы сот судья­сы О.Қожабаев, әйел­дер арасын­да Ақмола облысындағы Жақсы аудандық сотының судьясы З.Жола­манова, бильярдтан Жоғарғы Соттың судьясы Р.Мамырбаев, шахмат­тан ерлер арасында Сол­түс­тік Қазақстан облыстық сотының судьясы Б.Кенженов, әйелдер арасында Қостанай қаласы №2 сотының судьясы А.Байжұманова, дойбыдан ерлер арасында Жоғарғы Соттың судьясы Б.Мақұлбеков, әйелдер арасында Сол­түстік Қазақстан облысының Қы­зыл­жар аудандық сотының судьясы А.До­сымова үздік көрсеткішке қол жеткізді. Іріктеу ойындарының жеңім­паз­дары қыркүйек айында Алматыда өте­тін финалдық ойындарда өз өңір­ле­рінің намысын қорғайтын болады. Нәзира ЖӘРІМБЕТОВА, «Егемен Қазақстан». ҚОСТАНАЙ.