Президент кәсіпкерлерге жолдаған Үндеуінде Қазақстанда шағын және орта бизнесті өркендетуге баса мән берілетінін айтып, кәсіпкерлер палатасының отандық бизнестің бәсекеге қабілеттілігін арттырудағы маңызына тоқталған.
«Отандық бизнес еліміздің экономикасын өркендетуге айрықша ықпал етеді. Біз нарықтық экономика құрып жатырмыз. Сол себепті өнеркәсіп саласында, экономикада өзгерістер жасау және елімізді дамыту жолында жауапты әрі мықты кәсіпкерлер қауымы басты рөл атқарады. Қазақстанда шағын және орта бизнесті өркендетуге баса мән беріледі. Соңғы он жылда осы саланың жалпы ішкі өнімдегі үлесі екі есе өсіп, 34 пайызға жетті. Бүгінде бизнесте 3,5 млн-нан астам адам еңбек етіп жүр. Осы уақыт ішінде ұлттық кәсіпкерлер палатасы мемлекеттің толыққанды әріптесіне айналды. «Атамекеннің» микро және шағын бизнесті қолдаудағы, өңірдегі кәсіпкерлікті дамытуда басымдық бере отырып, жасап жатқан ауқымды өзгерістері еліміздің алдында тұрған мақсат-міндеттерге толық сай келеді. Сіздердің алдарыңызда мемлекеттік және салалық бағдарламалар қабылдап, жүзеге асыру, нарыққа сапалы сараптама жасау үдерісіне қатысу үшін жаңа тәсілдер әзірлеу міндеті тұр», делінген Президенттің үндеуінде.
Сонымен қатар Мемлекет басшысының үнедеуінде кәсіпкерлер палатасы отандық бизнестің бәсекеге қабілеттілігін арттыруға, қызметін жауапкершілікпен атқаруға ынталандыруға және жұмыс орындарын ашуға атсалыса отырып, билік пен іскер азаматтарды байланыстыратын тиімді арнаға айналу тиіс екені айтылған. «Атамекен» тауар өткізу нарығын кеңейтуге рұқсат беру рәсімдерін жеңілдетуге, мемлекеттік сатып алу жұмысының қолжетімді болуына және сыбайлас жемқорлық қаперін азайтуға барынша септігін тигізуі керек.
Сондай-ақ Қасым-Жомарт Тоқаевтың үндеуінде палата отандық кәсіпкерлерліктің бетке ұстар өкілдері мен шағын және орта бизнес субъектілері арасында өзара тиімді ықпалдастық орнатып, үйлесімді жұмыс істеуін қамтамасыз ету жолында маңызды рөл атқаратыны мәлімделген. Микро және шағын бизнес өкілдерін тексеруге жарияланған мараторий тағы бір жылға ұзартылғанын да атап өтіпті.
«Мемлекет шағын және орта бизнестің дамуына барынша жағдай жасап, кез келген заңды кәсіпкерлік қызметке қолдау көрсетеді, оны қорғайды. Елімізде адал бәсеке, әлеуметтік жауапкершілік, жасампаз еңбек құндылықтарын басшылыққа алатын кәсіпкерлердің жаңа қауымы қалыптасуы өте маңызды. Қазақстанда бизнесті өңірлік қана емес, жаһандық деңгейде өркендетуге мол мүмкіндік бар. Мемлекет палатамен бірлесіп, ұлттық экономиканы монополиядан арылту, нарықтарды игеру, барлығына түсінікті әділ ойын ережесін қалыптастыру үшін жүйелі жұмысты жалғастырады. Мемлекет пен бизнестің бірлесіп жұмыс істеуі елімізді әлеуметтік-экономикалық тұрғыдан дамытуға және халықтың әл-ауқатын арттыруға жол ашады деген сенімдемін», делінген үндеуде.
Премьер-Министрдің орынбасары – Қаржы министрі Ерұлан Жамаубаев өз сөзінде нақты сектор экономика өсімінің маңызды драйвері болып қала беретінін жеткізді. Атап айтқанда, салалар бойынша ауыл шаруашылығы, ақпарат және байланыс, құрылыс, көлік және қоймалау, сондай-ақ өңдеу өнеркәсібі мен сауда жоғары өсуді көрсетіп келеді.
– Жеке бастамаларды қолдау және дамыту экономикадағы шағын және орта бизнес үлесін 2021 жылы 34 пайызға дейін ұлғайтуға мүмкіндік берді. Ұлттық палатаның белсенді қатысуымен 2021-2025 жылдарға арналған кәсіпкерлікті дамыту жөніндегі ұлттық жоба әзірленіп, іске асырылуда. Оның шеңберінде бизнесті қолдау жөніндегі түрлі құралдар шоғырландырылды. Сондай-ақ кәсіпкерлік белсенділікті ынталандыруға және кәсіпорындардың бәсекеге қабілеттілігін арттыруға бағытталған шағын және орта бизнесті дамытудың 2030 жылға дейінгі тұжырымдамасы қабылданды. Инвестициялық ахуалды жақсарту мақсатында Инвестициялық саясат тұжырымдамасы бекітілді. Осы бағыттағы жұмыстың негізгі векторлары айқындалды және шамамен 30 трлн теңгеге 850 инвестициялық жобадан тұратын пул қалыптастырылды. Қазіргі уақытта Мемлекет басшысының тапсырмасына сәйкес жаңа Салық кодексін әзірлеу басталды. Арнайы жұмыс тобы құрылды, оның құрамына ұлттық палата мен бизнес-қауымдастықтардың өкілдері кірді. Салықтық әкімшілендіруді жетілдіруге ерекше назар аударылатын болады, – деді Е.Жамаубаев.
«Атамекен» ұлттық кәсіпкерлер палатасының съезіне республиканың барлық өңірінен 300-ден аса кәсіпкер қатысты. Онда тоғыз мәселе қаралды. Палатаның атқарылған жұмысының есебі тыңдалды. Трансформациядан кейінгі ұлттық палатаның жаңа тәсілдері пысықталды. Сондай-ақ жаңадан құрылған Абай, Жетісу және Ұлытау облыстарында палатаның өңірлік филиалдары іске қосылды.
– Биылғы съезд тарихи ерекше кезеңде – еліміздің стратегиялық дамуын айқындайтын үлкен науқан кезінде ұйымдастырылды. Мемлекет басшысы Қасым-Жомарт Кемелұлының «Әділетті Қазақстан» құрудағы бағыт-бағдары белгіленді. Осы бастаманың шеңберінде «Әділетті экономика» қағидасына сүйене отырып, біз «Атамекен» ұлттық кәсіпкерлер палатасы ретінде еліміздің кәсіпкерлеріне толықтай жағдай жасау мақсатында трансформация кезеңнен өтіп жатырмыз. Трансформацияны сапалы іске асыру үшін күш-жігерімізді жұмылдырып, үлкен мақсатқа жетуіміз қажет. Бұл – ортақ міндет және жауапкершілік, – дейді «Атамекен» ұлттық кәсіпкерлер палатасының басшысы Райымбек Баталов.
