Кандидат өзінің сайлауалды бағдарламасын таныстыру барысында әлеуметтік әріптестік институтын дамытудың, тәуелсіз кәсіподақтар мәртебесін көтерудің, экономика мен еңбекақы төлеу жүйесін реформалаудың маңыздылығын атап өтті.
Айта кетейік, бүгінде кәсіпорында 500-ден астам адам жұмыс істейді, олардың 90 пайызы – кәсіподақ мүшесі. Осыған байланысты кандидат еңбекшілердің мүдделерін қорғайтын ұйымдардың мәртебесін көтеруге баса назар аударды.
«Бәріміз жоғары табыс алғымыз келеді. Бұл біз үшін кіріс болса, жұмыс беруші үшін шығын. Сондықтан жалақы мөлшерінің қандай болуы керектігін, оны қалай көбейтуге болатынын талқылау қажет. Бұл мәселені салалық деңгейде шешкен жөн. Ол үшін қызметкерлер өз құқықтарын қорғау мақсатында кәсіпкерлермен және жұмыс берушілермен бірлесіп еңбекақы төлеу жүйесін әзірлейтін салалық кәсіподақтарға сенім артуға тиіс», деді М.Қажыкен.
Кандидат «кәсіподақтар арасынан ұсынылдым, демек барлық жұмысшы көтерген мәселелерді шешу жауапкершілігі жүктелген» деді. Үміткер сапалы және қолжетімді білім беруді, денсаулық сақтау саласын қаржыландыруды және әлеуметтік жағдайы төмен отбасыларға тұрғын үй беруді қолдайтынын айтты.
