Мүсінші Бақытжан Әбішевтің шығармашылығы 1970-жылдары Қазақстан бейнелеу өнеріне өзіндік ұлттық мәнерімен енді. Оның шығармаларының құндылығы, туындыларының сюжеттік мазмұнының ауқымдылығымен, пластикалық шешімдер табудағы шеберлігі һәм кеңістікте мүсін жасаудағы еркіндігімен ерекшеленеді. Экспозицияда автордың 40-қа жуық мүсіндік туындылары мен ол сомдаған монументалды ескерткіштердің фотосуреттері ұсынылған.
Станоктық мүсіннен басқа Бақытжан Әбішев монументалды пластика саласында тың ізденістерге барды. Қазақстанның айшықты қалаларында орнатылған қазақ халқының ұлы тұлғалары мен батырларына арналған қаншама ескерткіштер шебердің қайталанбас қолтаңбасы. Олардың арасында: «Жамбыл Жабаев» (1996, Алматы), С.Сейфуллин (Қарағанды), С.Торайғыров (Баянауыл), Махамбет Өтемісұлы мен Исатай Тайманұлы (2003, Атырау), Әлия Молдағұлова (2004, Ақтөбе. 2008, Астана. 2005, Мәскеу.) т.б. бар. Мүсіншінің туындылары Ә.Қастеевтің музей қорында, Германия, Швейцария, Ресей елдерінің жеке коллекцияларында сақтаулы.
Әбішев әлемінде жылқы образы айрықша орын алады. Оның «Құлагер» (1986), «Ұран» (1986), «Жауынгер» (1987) туындылары қазақ халқының рухын сездіретін күрделі динамикалық қозғалыста берілген. Өнер иесінің әйел образындағы композицияларының кейіпкерлері – әйел-ана, ошақтың қамқоршысы, атқа қонған қайсар қыздар кейпінде. Б.Әбішев олардың бейнелерін сомдау арқылы өзінің сұлулық, адамгершілік, рухани тектілік турасындағы танымын паш етеді. Әсіресе «Ұмай» (1986), «Күту» (1985), «Томирис» (1994), «Аттылы» (2004) деп аталған туындылары композициялық әуезділігімен баурайды. Суреткердің мүсіндік туындыларының көбі қазақ тарихымен, халық өмірі және салт-дәстүрімен астасып жатыр.
– Бақытжан Әбішев – саналы ғұмырын өнерге бағыштаған санаулы дарынның бірегейі. Мүсін әлемінің құпиясын шебер меңгерген ол өнердегі тазалықты сүйді. «Әбішев әлемі» атты көрме өнер жанкүйерлерін мүсінші жасаған бейнелердің ерекше және бай әлеміне үңілуге шақырады, сол арқылы нағыз өнердің сиқырын сезінуге мүмкіндік береді. Оның қаламынан өрілген сәулетті мүсіндер қазақ даласының айбарын асқақтатып тұр. Көрме қараша айының 19-на дейін жалғасады, – дейді көрме жетекшісі Лаура Әбілдаева.
АЛМАТЫ
