Әзілхан Нұршайықов соғыстан кейінгі жылдары КазГУ-ді аяқтаған соң «Қазақстан пионері» және «Социалистік Қазақстан» газеттерінде жұмыс істегені мәлім. Халық шаруашылығын қайта қалпына келтірудің ауыртпалығы мол кезеңде де өз ортасына орай сәнді киіну сол заманның интеллигенция өкілдеріне бұлжымас заңдылық еді. Қара түсті костюм-шалбар, ақ көйлек, басына шіләпі кию зиялы адам екенін танытып тұратын.
Облыстық Бұқар жырау атындағы әдебиет және өнер музейіне жуықта Алматыдан Әзағаның заттары әкелінді. Қаламгер өмірден өтер алдында киген костюм-шалбары, көйлегі, әйгілі қалпағы мен қаламсабын, сирек кітаптарын қызы Жанар Нұршайықова музей қызметкерлеріне арнайы табыстаған. Мекемедегі негізгі қор бөлімінің басшысы Мейрамғали Есмұқанов бұл жәдігерлер жазушының мерейтойында Кереку жұртшылығы үшін үлкен сый болғанын айтады.
Жанар апаймен телефон арқылы тілдескенімізде қаламгер басынан тастамаған шіләпінің бірнешеуі болғанын білдік.
– Елуінші жылдардың басында біздің отбасымыз Павлодарға көшіп барды. Әкеміз облыстық «Қызыл ту» газетіне редакторлық етіп, басылымды дамытуға көп еңбек сіңірді. Сонда байқайтынымыз, жергілікті интеллигенттер арасында шіләпі киген ағалар аз болатын. Әкеміз су жаңа костюм-шалбар, салқын күні басына қара шіләпісін кигенде елден ерекшеленіп тұрушы еді. Баскиімді анамыз дүкеннен арнайы сатып әперген. Ол кезде ер адамдарға арналған сәнді киім шықса, анамыз жұрттың алды болып барып, әкеме сатып алуға тырысатын. Ерінің үсті-басы мұнтаздай таза болуын, қалтасындағы бет орамалының күн сайын ауыстырылып тұруын қадағалайтын. Анам өмірден өтіп бара жатқанда да әкеме және бізге тазалықты үлгі етіп кетті. Кейін келіні Света атасының күтіміне жауап берді. Оған деген алғысымыз да шексіз. Әкеміз өмірден өткенше киімінің өңіріне қылшық тұрмайтын. Республикалық телеарналар сұхбатқа шақырғанда әкеміз эфирге жарқырап шыға келетін, бет-жүзі әдемі болып көрініп отыратын, – деп еске алды Жанар апай.
Атап өтерлігі, жазушы-журналист Павлодар облыстық «Қызыл ту» (қазіргі «Сарыарқа самалы») газетін 1953-56 жылдар аралығында басқарды. Басылым таралымын көбейту үшін газетте Мұхтар Әуезов, Сәбит Мұқанов секілді әйгілі қаламгерлердің туындыларынан үзінділер беріп, руханиятқа сусап жүрген оқырманның шөлін қандырды. Сол уақытта өңірлік басылымның таралымы өсіп, абырой-беделі қалыптасты. Әзағаның осы уақытта шығармашылық тұрғыдан толысып, көркем дүниелерді қолға ала бастаған уақыты да болған екен. Халық жазушысы бұл туралы: «Павлодар мені әдебиет аспанына көтерген космодромым болды», деп жазып кеткен.
ПАВЛОДАР
