Дәрі-дәрмек өзімізде де шығарылады

Степногор қаласында биология ғылымдарының кандидаты О.Теннің жетекшілігімен ағза белсенділігін арттыру және вирусқа қарсы белок­тар жиынтығын қамтамасыз ететін жаңа биотехнологиялық жоба жүзеге асырылуда. Аталған ғылыми ізденісті  қаржыландыру Білім және ғылым министрлігінің технологияларды коммерцияландыру жобасы аясында жеңіп алынған грант есебінен қамтамасыз етіледі. Соңғы онжылдықта, бүкіл әлемде денсаулық сақтау саласына шығын­ның өсуіне, жаһан тұрғын­­дарының, әсіресе дәрі-дәрмекке зәру адамдар санының артуына байланысты биоәркелкілік индустриясы күрт дамуда. Мамандардың айтуынша, Қазақстанда жыл сайын онкологиялық кеселдің әртүрлі сатыдағы 1500 фактісі тіркелуде. Оны емдеу бары­сын­да сырқаттың ағзасы зардап шеге­тіндіктен, оған қарсы дәрі-дәрмектер шетелдерден қымбат бағаға сатып алынады. Қазіргі таңда отандық ғылым осы бір осал тұстың орнын толтыруда елеулі қадамдар жасап отыр. Ұлттық биотехнология орта­лы­ғы­ның филиалы ретінде құрылған Степногордағы тәжірибелік өндіріс ор­­нында микробиологиялық синтез жолымен белок алуға қатысты ұйым­дық шаралар жүргізілуде. Ал, 2015-2016 жылдары импорт алмастырушы дә­рі-дәрмектер өндірістік бағытта шы­­ғарыла бастайды деп жоспарлану­да.­ Бақберген АМАЛБЕК, «Егемен Қазақстан». Ақмола облысы.