Әріптестік екі жаққа да тиімді

Қазақстан мен Ресей арасындағы интеграциялық байланыстар  орта және жоғары білім беру ісінен де кең көрініс тауып отыр. М.Өтемісов атындағы Батыс Қазақстан мемлекеттік университеті ресейлік жоғары оқу орындарымен бірлескен жобаларды іске асыруға мүдделі. Осы мақсатта Орал қаласында Ресейдің Ульянов қаласынан келген ғалымдар өздері жасақтаған озық жобаларды ортаға салды. Улья­нов мемлекеттік педагогика­лық университетін жылына мың­даған түлек тәмамдайтын болса, соның 75 пайызы  – педагог-мамандар. Кездесу барысында екі оқу орны бірлескен оқу бағдарламасын жасау, қазақстандық магистранттардың Ресейде ғылыми іс-тәжірибеден өтуін қамтамасыз ету, студенттер­дің әлеуметтік жағдайын жақсар­ту секілді бірнеше инновациялық жо­баларды талқылады. Кездесу барысында халықаралық ынты­мақтастық аясында екі жақты байланысты нығайту үшін мемо­ран­думға қол қойылды. – Ресейлік жоғары оқу орны мамандары шағын мектептердегі жұмыс тә­жі­рибесімен бөлісті. Бұл – еліміздегі білім беру саласындағы күрделі мәселелердің бірі. Осыған орай шағын мектептерге мұғалімдер дайындауда Ульянов мемлекеттік педагогикалық университетінің мол тәжірибесі бар және бұл жағынан да бо­ла­шақта жиі тә­жі­рибе алмасатын боламыз,  – дейді М.Өтемісов атын­дағы Батыс Қазақстан мемлекеттік университетінің бірінші проректоры Әсет Тасмағамбетов. Ал Ульянов мемлекеттік педа­го­гикалық универ­ситетінің ғылы­ми жұмыстар жөніндегі проректоры Наталья Ильинаның айтуынша, екі жаққа да өте тиімді әріптес­тік байланыс тек педагог мамандарды ғана емес, жалпы әлеумет­тік-гуманитарлық салада­ғы кадр­ларды даярлау бойынша да ай­қын көрініс тауып отыр. Білім бе­ру бағдарламасы аясында даяр­лықтан өткен мамандар бірден Ресейдің және Қазақстанның дип­­­ломын иеленеді. Тағы бір басым­дығы,  академиялық ұтқы­рлық негізінде білім алатын жас ізденуші ғалымдармен бірге магистранттар мен профессорлық-оқытушылар құрамының қатары да арта түседі. Рита СҰЛТАНҒАЛИЕВА, М.Өтемісов атындағы Батыс Қазақстан мемлекеттік университетінің  баспасөз хатшысы. ОРАЛ.