Білуімізше, бұл – қазақ дубляжының табысты қадамының бірі. Қазақшасы мүлтіксіз десек, артық айтқандық емес. Кейіпкерлерді сөйлеткенін былай қойғанда, күлгені, деміккені, ышқынғаны – бәрі қазақы үн ерекшелігімен үйлесіп-ақ тұр. Оған басты себепкер болып, қолға алған – Мәдениет және спорт министрлігі мен «Меломен» және «Арай медиа групп» шығармашылық ұжымының бірлескен еңбегін атап өткен жөн. Фильмнің қазақша нұсқасының көрсетіліміне қатысқан Мәдениет және спорт министрі Дәурен Абаев әлемдік деңгейдегі сапалы контентті қазақшалауда ауқымды жұмыстар атқарылып жатқанын жеткізді.
«Қазақ тіліндегі кинокартиналарға сұраныс артып келеді. Халыққа рейтингі жоғары фильмдерді қазақ тілінде көрсету – идеологиялық тұрғыдан да аса маңызды. Осы мақсатта біз голливудтық жаңа туындыларды ана тілімізге дубляждау бойынша арнайы жобаны қолға алған едік. Тілге деген ең үлкен қолдау – оны қолдану. Бүгінде ана тілімізде сөйлейтін жастар да, оны үйренгісі келетін өзге ұлт өкілдерінің де қатары артып келеді. Сондықтан қазақтілді контентті бірге дамытайық», деді Дәурен Әскербекұлы.
Осы блокбастерді есептегенде MARVEL студиясының жетінші фильмі қазақша дыбысталып, көрерменге жол тартып отыр екен. Бұған дейін осы тақылеттес «Аватар» сияқты фантастикалық дүниелер аударылыпты, енді мына «Қара Қабылан» қазақша «кісен ашты». Сонда біздің «Ер Төстік», «Қобыланды» сынды ертегі, эпостарымыз қайда қалды?.. Олар да тап осы дүниелер сынды аспан, жерүсті, жерасты әлемдерінің өмірінен сыр шертетін қаһармандық рухтағы ғажайыптар емес пе? Академик Сейіт Қасқабасовтың ертегі-мифтер туралы еңбегін оқып, тұшынған кәсіби кино мамандары фантастикалық блокбастердің атасы қазақ ертегі-мифтерінде екендігін айқын білер еді. Мәселен, «Ер Төстікте» жер астындағы Жылан Бапы хан патшалығы. Төстіктің оған түсуі, Шалқұйрықтың бір тал қылын өртегенде жетіп келетін ғаламат детальдар – бәрі тұнып тұрған қиял-ғажайыптар, әлі болмаған, түсірілмеген блокбастер емес пе? Тура сол сияқты, мына «Қара Қабыланда» да Африкадағы дүниеде болған, болмағаны белгісіз патшалықтар әлемінің тағажайыптарынан сыр шертіледі. Біздің дәуірімізге дейінгі көне патшалықтардың шайқастары бүгінгі технократтық заманмен байланысты өрбиді. Демек, ертегі-мифтердегі түпсана өлмейді.
Мәселен, қара қабылан көнедегі Ваканда елінің киесі мен қорғаушысы іспетті. Фильмде Т’Чалла патшаның қазасынан кейін Рамонда патшайым тақ мұрагері жалғыз қызымен қалады. Олардың қолындағы ғаламат «Вибраниум» әлемдегі АҚШ сияқты алпауыт мемлекеттер қол сұға бастайды. Осы кезде тарих сахнасына біздің дәуірімізге дейін жасаған суасты елінің әміршісі Нэморд шығады. Бұлар өзара шарпысқанда, араларында небір ғаламаттар қылаң береді. Көне дүние мен осы заманның арасы бір-ақ қадам. Демек, болашақ та сол екеуінен бастау алады.
Жаһан сұмдық көретін Америка халқы адаспас үшін осындай қадамдарға барып жатыр, тіпті түп-тамырында ондай дүниелер болмаса да, өздері жойып жіберген өркениеттерді тірілтіп, халқының танымына бейімдеуде. Ал біздің баба таным сайрап тұр, тек бүгінгімен сабақтастырып, кино тіліне көшірсе жеткілікті.
