Жақында Индустрияландыру картасы аясында «ҚазПромБезопасность-ПВ» ЖШС жоғары қысымды ыдыстар, жылу алмасу аппараттары мен металл құрастырмаларын шығаратын жаңа инвестициялық жобаны іске қосты. Соның нәтижесінде серіктестікте қосымша 15 жұмыс орны ашылды. Өндіріс басшысы Ержан Хамзиннің айтуынша, жаңа жобаларға жалпы сомасы 200 млн теңге жеке инвестиция тартылған.
– Біздің кәсіпорнымыз жаңадан құрылып жатыр. Қазіргі күні ауамен салқындатқыш, жылу алмастырғыш аппараттарын, Ф-цилиндрлі бұйымдарын, желілік жылытқыштарды, арнайы ыдыстар мен түрлі ауқымдағы металл құрастырмаларын әзірлейміз. Тек қана металл құрастырмалар бойынша жылына 500 тонна бұйымдар жасап шығуға мүмкіндігіміз бар, – дейді кәсіпорын директоры.
Жазда облыс орталығында мұнай-химия өнімдерін әзірлейтін толық циклді кәсіпорын жұмысқа кіріскені де мәлім. Экспортқа бағытталған өндіріс орны жыл сайын 30 мың тонна реагенттер мен қоспалар жасап шығаруға мүмкіндік береді. Осылайша, «Қазмұнайхим» ЖШС Қазақстанда мұнай-химия өнімдерін толық циклмен өндіретін алғашқы кәсіпорын атанып отыр. Отандық мұнай өндіруші және мұнай өңдеуші кәсіпорындарын 60%-ға қамтамасыз етіп, ТМД, Еуропалық одақ, Таяу Шығыс және АҚШ елдеріне жеткізеді. Кәсіпорынның директоры Ален Кенжебаев жалпы жоба үш кезең бойынша жүзеге асырылатынын айтады. Инвестициялардың жалпы көлемі – 1 млрд теңге. Қазіргі кездің өзінде мұнда 40 тұрақты жұмыс орындары құрылған. Жылдың соңына таман күрделі мұнай-химия өнімдерін дайындауға мүмкіндік беретін жоғары температуралы синтез қондырғысының құрылысын бастау жоспарланып отыр. Жалпы, Павлодар облысында жүзеге асырылып жатқан бұл технологиялық үдеріс заманауи әлемдік экономика жағдайындағы нарықтың сұранысына жауап береді. Кәсіпорын мемлекет, бизнес және ғылымның өзара әрекеттестігін іс жүзінде дәлелдеп отыр.
«Стекломир» серіктестігінде өміршең етілген табақ шыны, яғни бірнеше қабатты терезелер дайындайтын жоба да өзінің ерекшелігімен танылып отыр. Жылына 120 мың шаршы метр терезе шынысын шығаруға қабілетті кәсіпорын жаңа жобаға 3 млрд теңге инвестиция құйған. Жаңа цехта жаңадан 15 жұмыс орны құрылып, кәсіпорынның өнім өндіру көрсеткіштері арта түсті. Тек бір ауысымда мұндағы жұмыскерлер 7 мың шаршы метр терезе дайындайды. Кәсіпорынның бұйымдары өз елімізбен қатар, Өзбекстан, Тәжікстан, Қырғызстан, Ресей мемлекеттерінің нарығына шығарылады.
Жалпы, «Стекломир» ЖШС «Бизнестің жол картасы-2025» аясында 2 млрд теңгеден астам пайыздық мөлшерлемені субсидиялау түрінде мемлекеттік қолдауға ие болған. Былтыр «Қарапайым заттар экономикасы» бағдарламасы аясында кәсіпорынның 3,7 млрд теңге сомаға кредиттік портфель жобасы қаржыландырылды. Кәсіпорынның еңбек ұжымы жыл сайын өсіп келеді. Екі жыл бұрын мұнда 270 адам жұмыс істесе, қазір 468 қызметкер еңбек етеді. Зауыт директоры Владимир Высоцкий білікті жұмысшылар жетіспейтінін жеткізді.
Ал өңірдегі мұнай-химия саласындағы ірі кәсіпорындардың бірі «Компания Нефтехим LTD» ЖШС алдағы желтоқсан айында экпоксидті қосылыс (компаунд) цехын ашуды жоспарлап отыр. Жылына 10 мың тонна өнім өндіреді деп болжанған жаңа өндіріске 1,5 млрд теңге инвестиция құйылған. Мұнда қосымша 37 жұмыс орны пайда болып, бюджетке жаңа кіріс көздері ашылады.
Павлодар облысы әкімі баспасөз қызметінің дерегіне сүйенсек, аймақта жыл басынан жалпы сомасы 44,5 млрд теңгені құрайтын 70-ке жуық инвестициялық жоба жүзеге асырылып жатыр.
Павлодар облысы
