Кеден одағы көптеген позициялар бойынша әлемде алда тұр

АСТАНА. 29 мамыр. Бүгін «Нұр Отан» партиясы төрағасының бiрiншi орынбасары Бауыржан Байбек Кеден одағы көптеген позициялар бойынша әлемде жетекші орынға ие болып келе жатқанын мәлімдеді.Бұл туралы BNews.kz тiлшiсi хабарлады. «Кеден одағы көптеген позициялар бойынша әлемде жетекші орындарда тұр. Атап айтар болсақ, мұнай мен газды өндіру бойынша 1-орынға, минералды тыңайтқыштар өндіруде 2-орынға, электр энергиясы бойынша 3-орынға, бидай, көмір және болат өндірісі бойынша 4-орынға шықты. Оның үстіне, құрылтайшы мемлекеттердің бірі – Ресей алтын-валюта қорларының көлемі бойынша 3-орында, ал экономикасы бойынша 5-орында келеді», - деді ол. Партия жетекшісінің орынбасары осы сөздің орайында Қазақстан Еуразиялық экономикалық одаққа кіру арқылы бұрынғы 17 миллиондық нарығының орнына одан  9 есе үлкен, 153 миллион адамдық тұрғыны бар жаңа нарыққа шығатындығын тілге тиек етті. Мұрат Айтқожа. Дереккөз: BNews.kz. Фото: agencyrating.kz.