Жеңімпаздарды әскери оркестрдің әуенімен қарсы алған қала тұрғындары, клуб жанкүйерлері, бір топ спорт сүйер қауым қаладағы «Әл-Фараби» алаңына жиналып, салтанатты құттықтау рәсіміне қатысты. Мұнда қалалық әкімдіктің басшылық құрамы жеңіспен оралған жергілікті клубқа футболдан Қазақстан кубогін салтанатты түрде тапсырып, ордабасылық ойыншыларды үлкен марапатымен құттықтады.
Алғашқы болып сөз алған Шымкент қаласы әкімінің бірінші орынбасары Шыңғыс Мұқан чемпиондарды нағыз батырларға теңеп, команданың жеңісі мегаполистің футбол тарихында қол жеткізген үлкен табысының бірі болғанын атап өтті.
– «Ордабасы» командасын футболдан өткен жарыста 2022 жылғы Қазақстан кубогін иеленумен құттықтаймыз! Сіздер ақтық сында табандылық танытып, жеңісті жұлып әкеттіңіздер. Сол үшін де шымкенттік жанкүйерлер сіздерге риза. Жарайсыздар, қанды тулатқан нағыз тартысты ойын көрсеттіңіздер. Сіздермен ел мақтанады. Талантты ойыншы екендіктеріңізді дәлелдедіңіздер. Халықтың сенімін ақтағандарыңыз үшін мың алғыс. Шымкент қаласының әкімі Мұрат Дүйсенбекұлы сәлем жолдап, құттықтап жатыр. Бұл тілекке қосыла отырып, Шымкент қаласының тұрғындары атынан да, «Ордабасы» жанкүйерлері атынан да құтты болсын дейміз, – деген Шыңғыс Жұмабекұлы сөзін сабақтап, қала әкімі финалдық ойында стадионда болып, матч біткенше жанкүйерлермен бірге жарысты тамашалағанын жеткізді.
– Осылайша қала басшылығы өздеріңізге қолдау көрсетіп, ыстық ықыласын білдірді. Жалпы, тартысқа толы болған «Астана-Аренадағы» ойында барша шымкенттік жанкүйер жұмыла жұдырық болып сіздерге мықты рухани демеу көрсеткенін көрдік. Құдай қаласа, келесі жылғы ел чемпионатында алға қойған үлкен мақсаттар орындалып, алғашқы үштіктен көрінерсіздер деген үміттеміз. 2023 жылы мегаполисті спортта үлкен сый күтіп тұр. Шымкент қаласы Еурокубок ойындарын қабылдайды. Әлбетте бұл – тек «Ордабасы» клубының ғана емес, бүкіл Шымкенттің, миллионан астам тұрғыны бар республикадағы әсем шаһардың футбол спортындағы тұғырлы жеңісі. Әрине, осындай спортшылар арқылы аулада доп тепкен талай баланың арманы биікке қарай өрлейтіні анық, бұл – жастар үшін еліктеуге тұратын жайт. Ендігі тілегіміз бен ниетіміз «Ордабасының» ерлікті қайталап, келесі жылы чемпион болуы! – деді ол.
Осыдан кейін сөз алған «Ордабасы» клубының президенті Бауыржан Абдубайтов жеңімпаздарды көптен аңсаған кубогімен құттықтап, алдағы уақытта да жергілікті команданың жанкүйерлерді жеңістерімен қуанта беретініне сендірді. Ендігі жерде көп еңбектеніп, команданың сапалық дәрежесін жаңа сатыға көтеру жолында жүйелі жұмыс жалғасатынын жеткізді.
– Бұл жеңіске барша қала тұрғынының да қосқан үлесі бар. Сіздердің қошеметтеріңіз, қала әкімінен бастап барлық жанкүйерлерге дейінгі білдірген ыстық ықыластарыңыз футболшыларға, жалпы команда мүшелеріне рухани азық, мықты ынталандырушы күш болды. Осындай қолдаушыларымыздың барына қуанамыз. Әрдайым амандықта жүріңіздер, – деді клуб президенті.
Жиналған барша жұрттың алдында сөз бастаған команда капитаны Самат Шәмші «Астана Аренадағы» матчтың аса тартысты өткенін, бар ой-арман қалайда жеңіске жету болғанын айтты. Әлі де іштей толқып тұрғанын жасырмаған ол алаңда ойнап жүріп стадиондағы барлық жанкүйердің қолдауын сезінгенін жеткізді. Содан жігіттер жігерленіп, соңына дейін таласып, намысқа тырысқан. Соның нәтижесінде соңғы минуттар қалғанда есепті өз пайдаларына шешіп, жеңісті қарсыласының қолынан жұлып әкеткен.
– Шымкенттік жанкүйерлерге рахмет! Астанада үнемі біздің қасымыздан табылды. Қандай қолдау білдіре алатындарын өз көзімізбен көрдік. Мұндайда ішкі сезімді, көңіл толқытқан эмоцияларды айтып жеткізу қиын ғой, сірә. Маусым бойы бізден көмегін аямаған қала әкіміне, спорт саласына жауапты барша маманға және клуб басшыларына тегіс алғыс айтамыз. Қуанышпен айтқым келіп тұрғаны, міне, араға 11 жыл салып, Қазақстан кубогі Шымкентке екінші мәрте қайта оралып отыр. Бізге тілекші болған баршаңызға алғыс жаудырамын!, – деді команда капитаны.
Осынау іс-шарада алаңға жиналған жанкүйерлер фуболшыларды қаумалап құрмет көрсетіп, қошеметтерін аямады. Қала әкімінің орынбасары Мақсұт Исахов та тебірене сөз сөйлеп, футбол клубының ерлігіне шынымен тәнті болғанын айтты.
– Құрметті Шымкент қаласының тұрғындары. Бұл жеңістің бағасы біз үшін өте қымбат. Оның өзіндік себептері де жоқ емес. Өйткені «Ордабасының» жолында әртүрлі кедергілер, қиындықтар кездесіп жатты. Оны жақсы білеміз. Екіншіден, «Ордабасы» – Қазақстан Премьер-лигасындағы ең жас команда. Футболшылардың орташа жасы 22-ні құрайды. Міне, осындай себептерге қарамастан, біздің жігіттер табандылық көрсетіп, жанкүйерлерге, бізге күшті көңіл күй, қуаныш сыйлады. Тағы да мақтанышпен айтқым келгені, финалдық кездесуде алаңға алғашқы минуттардан бастап шыққан 11 футболшының жетеуі – өзіміздің қазақстандық ойыншылар. Ал жалпы, клубтағы 25 ойыншының 17-сі – қазақтың қарадомалақ балалары, Шымкенттің түлектері. Яғни олардың барлығы да клубтың тәрбиеленушілері. Десек те келесі жылы алдымызға қойып отырған үлкен мақсаттар бар. Ендеше 11 жылдан кейін Шымкентке келіп жеткен Кубок тағы да құтты болсын! – деді ол.
Өз кезегінде көпшіліктің қошеметімен «Ордабасы» футбол клубының капитаны Самат Шәмші Қазақстан кубогін қала әкімінің бірінші орынбасары Шыңғыс Мұқанға салтанатты түрде табыстады. Іс-шара соңында жергілікті көркемөнерпаздар концерт қойып, ән-жырдан шашу шашты.
ШЫМКЕНТ
