Салтанатты іс-шараға қалалық әкімдік, қорғаныс істері жөніндегі департаменттің өкілдері, Қарулы Күштердің ардагерлері мен сарбаздардың ата-аналары арнайы шақырылды.
Бір жыл бұрын әскерге кеткен немересі Әлішер Тастыбайды қарсы алған Астана қаласының тұрғыны, зейнеткер Күлпән Шайсұлтанова игі іс-шараны ұйымдастырушыларға алғысын айтты.
– Әлішер қазіргі Қонаев, бұрынғы Қапшағай қаласындағы әскери бөлімде қызмет етті. Бір жыл ішінде немерем шыңдалған, шыныққан азамат болып оралды. Бөлім басшылығына мың да бір рақмет. Қызмет барысында баламызбен үнемі байланыста болдық. Парашютпен секірген суретіне дейін салып жіберетін. Мақтау қағаздары да жетерлік, – дейді қуанышын жасыра алмаған әже.
Пойыздан түскен сарбаздар сап түзеп келіп, топ басшысы әскери тәртіппен Астана қаласы қорғаныс істері жөніндегі департаментінің бастығы, подполковник М.Тұрыскелдиевке баянат берді:
– Подполковник мырза, астаналық сарбаздар 35-гвардиялық десанттық шабуылдаушы бригадасында абыроймен әскери қызмет атқарып, отбасына оралды. Топ басшысы, қатардағы жауынгер Әлішер Назиев!
Салтанатты марштан соң «Қарулы Күштер ардагерлері» қоғамдық ұйымының орынбасары, генерал-майор М.Нағұманов отбасына оралған сарбаздарды құттықтап, сөз сөйледі.
– Сіздерді бір жыл бұрын әскерге салтанатпен шығарып салған едік. Еліміздің тыныштығын қорғау жөніндегі халықтың тапсырмасын сіздер адал орындадыңыздар. Сіздерге берілетін ендігі тапсырма – берік отбасын құрып, ұрпақ өсіріп, адал еңбек ету. Еліміздің дамуына үлес қоса беріңіздер! – деді генерал-майор.
Қорғаныс істері жөніндегі департамент өкілдерінің айтуынша, әскери қызметтің беделін арттыру мақсатында мұндай іс-шараны ұйымдастыру алдағы уақытта дәстүрге айналмақ.
