Ақ желеңділер 158 аудан мен ауылдарды аралап, тұрғындардың денсаулығын бақылап қайтқан. Тіпті, қолда бар ем-дом амалдарын да жасаған. Құрамында терапевт, гинеколог, невропатолог, лор және ультрадыбыстық зерттеу жүргізу мамандары бар жылжымалы медициналық кешен ауыл тұрғындарына 24 700 диагностикалық, 21 805 зертханалық зерттеу және 52 206 консультациялық көмек көрсеткен.
Облыстық денсаулық сақтау басқармасының басшысы Арман Жансеңгіровтің айтуынша, бұл шаралар аурудың алдын алу мақсатында ұйымдастырылып келеді.
«Жылжымалы медициналық кешен азаматтардың денсаулығын кең спектрлі тексеруден өткізуге арналған. Бұл жобаның басты ерекшелігі, кез келген ауыл тұрғыны мамандардың тексеруінен өтіп, кеңес алуға мүмкіндігі бар. Яғни мақсатымыз – ауруды бастапқы кезеңінде анықтап, емдеу. Бір айта кетерлігі, аталған кешен қыста ауа райының қолайсыздығына байланысты көктем мен күз мерзімдері аралығында жолға шығып, тұрғындарды тексеруден өткізеді», дейді А.Жансеңгіров.
Жүргізілген тексерулер нәтижесінде облыста 949 адамнан әртүрлі ауру белгілері анықталып, толық тексеруге жолдама берілген. Айта кетейік, өңірде 8 жылжымалы медициналық кешен бар. Жалпы, кешен талдауларды қабылдау аймағы, функционалды диагностика, акушер-гинеколог, сондай-ақ сәулелік диагностика кабинеттерінен тұрады.
Жетісу облысы
