Өткен бес жылда газға қол жеткізе алатын талдықорғандықтардың тек жартысы ғана көгілдір отынға қосылған. Бұл – 30 мың абонент, яки тұрғындардың 55 пайызы ғана. Қала тұрғындарымен кездесуде облыс басшысы Бейбіт Исабаев бұл істің баяу жүруіне газға қосу құнының жоғары болуы себеп болып отырғанын жеткізді. Бүгінде қазандық пен жиынтықтар құнына байланысты газ қостыру 700 мың теңгеге дейін барады. Мұны естіген халық әбігерге түсуде.
«Залда мердігер компаниялардан келген өкілдер бар ма? Қазандықты есепке алмағанда газға қосылу құны неге қымбат, соны түсіндіріп беріңіздерші?» деп сұрады Б.Исабаев. Оған залда отырған «Дат Континенталь» ЖШС өкілі Алмас Смағұлов жиынтықтардың, соның ішінде құбыр бағасының өсуіне байланысты екенін жеткізді.
«Ал біз проблемаға басқа қырынан қараймыз. Әрине, қазандықтың, жиынтықтардың бағасы өскенін түсінеміз. Бірақ газға қосу жұмыстарының бағасын қолдан өсіруге болмайды. Сметалық есептерге сәйкес ол қазандық пен жиынтықтарды қоспағанда 170 мың теңгеден аспауы керек. Тұрғындарға әділетті баға ұсынылуы керек. Олай болмаған жағдайда қаланы газдандыру жұмысы «Жетісу Газ Сервис» МКК-ға берілетін болады. Оған қоса «ҚазТрансГазАймақ» АҚ халыққа көрсететін қызмет механизмдері мен мерзімдерін жедел түрде қайта қарауға тиіс. Өйткені компания тарапынан істі созбаққа салған жағдайлар аз емес. Рұқсат алу процедурасы 3-4 айға созылып кетеді, мұндайға жол беруге болмайды», деді Б.Исабаев.
Осы ретте қала әкімі Әсет Масабаев пен Бәсекелестікті қорғау мен дамыту департаментіне тиісті тапсырмалар берді. Сондай-ақ қала әкіміне «ҚазТрансГазАймақ» АҚ-мен бірлесіп, қолданыстағы газ құбырларының техникалық жағдайын тексеру мен диагностикалау жұмыстарын жылдам аяқтауды міндеттеді. Қазір газдың мөлшерден аз болуы жиі байқалады. Тұрғындар қақаған қыста үйден жылу қаша ма деп алаңдайды. Егер құрылыс жұмыстарының сапасыз атқарылу фактісі расталған жағдайда мердігер компанияларға талап қойылмақ. Бұл тізімде «МВК-Құрылыс», «Ақниет-БН», «ТурГаз» ЖШС-лары бар.
Жетісу облысы әкімінің баспасөз қызметінің мәліметіне сүйенсек, қараша айының соңына дейін «Үйтас» саяжайына, «Экспедиция» және «ИЖС 3-бөлімше» тұрғын үй алаптарына көптен күткен көгілдір отын беріледі. Сондай-ақ келер жылы «Жастар-2» тұрғын үй алабы мен (295 млн теңгеге) Ынтымақ елді мекенінде (1,4 млрд теңгеге) жүргізіліп жатқан газ құбырының құрылысы аяқталады. Сол сияқты 2023 жылдың ІІ тоқсанында қаланы газдандырудың негізгі жобасына кірмеген учаскелерде газ тарату желісінің құрылысы басталады. Атап айтқанда, бұл жұмыстар 6, 7-шағын аудандарда, «Плодопитомник», «Агропромышленник», «Жастар-1/1» тұрғын үй алаптарында, Мойнақ ауылында атқарылады.
«Менің тапсырмаммен қалған 8 елді мекенге, нақтырақ айтқанда «Алмалы», «Ащыбұлақ», «Мерекелік», «Сарыбұлақ», «Қызыл тас», «Балықты», «Қаратал» саяжайларына және «ИЖС 1-бөлімше» тұрғын үй алабындағы құрылыс жұмыстарына қатысты жобалық-сметалық құжаттарға қажетті есептеулер жасалып жатыр. Сөйтіп, 2025 жылы қаланың елді мекендерінің барлығы газдандырылады», деді Б.Исабаев.
Жалпы, облыс орталығына газ 2017 жылы жеткізілген. Қазіргі кезде қаланы газдандыру жұмыстары негізінен аяқталды. Көгілдір отынға тұрғындардың 90 пайызының қосылуына мүмкіндік жасалған.
Жетісу облысы
