Жаңа театр салынады

Жыл басында әкімдер халық алдында есеп береді ғой. Сол кезде өткен жылы жасалған жұмыспен қатар, болашақта атқарылатын толымды іс туралы да біліп жатамыз. Сондай жиында аймақ басшысы Қырымбек Көшербаев биыл Қызылорда қаласында жаңа театр салынатынын айтқан. Міне, жақында жаңа мәдениет ошағының эскиздік жобасы сәулет-қала құрылысы кеңесінде талқыланды. Театр Желтоқсан және Қорқыт ата көшелерінің қиылысында бой көтереді деп күтілуде. Жалпы аумағы 2,2 гектар жерді құрайды. Ғимараттың ені – 48, ал, ұзындығы 90 метр болмақ. Сыртқы келбетіне классикалық, шығыс және қазақ сәулет өнерінің үлгілері мен элементтері кеңінен қолданылмақ. Театр 3 қабаттан тұрады. Бірінші қабат шаруашылық-техникалық бөлмелерінен тұрса, екінші қабатта холл, вестибюль, киім ілетін орындар, әкімшілік бөлмелер, буфет, 400 орынға арналған көрермен залы және тағы басқа да қосалқы жайлар орналасады. Үшінші қабатта 200 адамға арналған көрермен залы қызмет етпек. Театр аумағында 200 автокөлікке арналған автотұрақ салу көзделуде. Театрдың қас бетіне шағын сәулеттік формаларды орналастыру жоспарлануда. Бұған қоса, А.Тоқмағамбетов атындағы театрдың ғимараты да қайта жаңғыртылады деп күтілуде. Ержан БАЙТІЛЕС, «Егемен Қазақстан». ҚЫЗЫЛОРДА.