«Егемен Қазақстан» газетінің ақпарат орталығын ашты
Бұл күндері еліміздегі іргелі білім ордасы әл-Фараби атындағы Қазақ Ұлттық университеті 80 жылдығын атап өтуде. Осыған орай ауқымды кезеңді артқа тастаған байырғы қарашаңырақта айтулы оқиғалар легі жүріп жатыр.
Соның бірі – еліміздің бас газетінің биыл атап өтетін 95 жылдығы мен университеттің 80 жылдық мерейтойына орай ұйымдастырылған «Егемен Қазақстан» – ел газеті» атты іс-шара.
Осы арада айта кету керек, бұл күнде БАҚ-тың белді өкілдері, елге танылған журналистердің басым бөлігі ҚазҰУ түлектері болып табылады. Сондықтан да газетіміздің өкілдері кешегі студенттік шақтың куәсі болған ұлттық университетте өткен кездесуге тағзым ете баруы заңдылық еді.
Осынау айтулы шараға «Егемен Қазақстан» республикалық газеті» АҚ президенті Сауытбек Абдрахманов арнайы келіп, студенттермен кездесіп, өз заманына қарай бейімделген жаңа ҚазҰУ қалашығын аралап, ауыз толтырып айтарлықтай тындырымды тірліктерді көрді.
Ата газет пен байырғы университеттің салтанатты тоғысуында ректор Ғалымқайыр Мұтанұлы «Егемен Қазақстан» газетінің дәуірлі кезеңдері туралы сөз қозғап, басылым шежіресі жайлы жастарға ақпар берді.
«Осынау мерейлі мерекелер тұсында ғылым-білім ордасы мен бүгінгі қазақ баспасөзінің көшбасшысы, бүгінгі өкілдері өткен күндер өрнектеріне замана көзімен шолу жасай отырып, болашаққа бағдар сілтеуге тиісті деп ойлаймын. Себебі, қазақ руханиятының екі алып бәйтерегінің алтын тамырлары тарих тереңінде түйісіп жатқандай», деді ректор.
Осыдан кейін «Егемен Қазақстан» газетінің басшысы Сауытбек Абдрахманов студенттерге замана ағысы, басылым бағдары, БАҚ-тың келешегі, бүгінгі күннің көкейкесті мәселелері жайында әңгімелеп берді. Студенттердің журналистикаға қатысты сауалдарына жауап берді.
Салтанатты жиында екіжақты Ынтымақтастық меморандумына қол қойылды. Сол сияқты ҚазҰУ Ғылыми кітапханасының егеменқазақстандықтар шығармашылығына арналған көрмесі ұйымдастырылды. «Егемен Қазақстан» газетіндегі ҚазҰУ шежіресі» атты бейнефильм көрсетілді. Сонымен қатар, қонақтарға арнап студенттер әннен шашу шашып, жыр шумақтарын арнады. Айтулы оқиға аясында Сауытбек Абдрахмановқа ҚазҰУ-дің 80 жылдық мерейтой медалі табыс етілді. Басылымның бірқатар журналистері университеттің Алғыс хаттарына лайық деп табылды.
Дәл осы күні журналистика факультетінде «Егемен Қазақстан» ақпарат орталығы ашылды. Ендігі жерде осы орталықтың көмегімен университеттің журналистика факультеті редакциямен тығыз қарым-қатынас орнатып, студенттерін тәжірибеден өткізіп, шығармашылық бірлескен жобаларды жүзеге асыруды көздеп отыр.
Айнаш ЕСАЛИ,
«Егемен Қазақстан».
АЛМАТЫ.
