Пікір • 25 Қараша, 2022

Маңызды таңдау

37 рет көрсетілді

Қазақстан халқы аса маңызды таңдау жасады. Біз еліміздің болашағын айқындап, саяси және әлеуметтік-экономикалық саладағы өзгерістерді одан әрі жалғастыруда Жаңа Қазақстанды құруға тікелей ықпал ететін шешуші кезеңде тұрмыз. Осындай сын сәтте ел басқару ісін парасатты, тәжірибелі, сенімді және халық қамын ойлайтын адамға тапсырдық. Бұл – Әділетті Қазақстанды құру жолында түбегейлі және жан-жақты реформаларды жүзеге асыру үшін аса қажет.

Халықтың Қ.Тоқаевтың әлеуметтік-экономикалық және саяси саладағы реформалары, елдің әл-ауқатын жақсартуға бағыт­талған бастамалары табыс­ты болатынына үлкен үміт артып отырғаны сөзсіз. Ел ең алдымен, Мемлекет басшысының ашық әрі әділ қоғам орнату жөніндегі бас­тамаларын толықтай қолдайды.

Біріншіден, конституциялық реформа елдегі түбегейлі сая­си жаң­ғырудың негізін қа­лады. Өздеріңіз білетіндей, халқы­мыз биыл 5 маусымда өткен жалпы­ұлттық референдумда Консти­ту­­цияға енгізілген өзгерістер мен то­лықтыруларды толықтай қолдады.

Олардың ішіндегі ең маңызды – Конституцияның 6-бабына енгізілген өзгеріс. Ол арқылы еліміздің Ата Заңында жер, оның қойнауындағы барлық табиғи ресурс, өсімдіктер мен жануарлар халықтың байлығы болып табылатыны бекітілді. Басқаша айтқанда, халық еліміздегі жер­дің, оның қойнауындағы бар­лық байлықтың иесі. Бұл құ­қықты халықтың атынан мемлекет жүзеге асырады. Әрбір қазақстандық жеріміздің және оның қойнауындағы байлықтың игілігін көруге мүмкіндік алады. Бұл құр сөз емес екеніне баршамыз куә болып отырмыз. Президент биыл 1 қыркүйектегі Жолдауында аталған норманың жүзеге асырылуының нақты тетігін ұсынды.

Мемлекет басшысы Ұлт­тық қордың жыл сайынғы инвес­тициялық табысының 50 пайызын балалардың арнаулы жинақ­таушы есепшотына аударуды ұсынды. Қаржы әр бала 18 жасқа толғанға дейін аударылып тұрады. Жинақталған қаржы балалар кәмелет жасына толғаннан кейін олардың баспана немесе білім алуына жұмсалмақ. Бұл бас­тама 2024 жылғы 1 қаңтардан жүзеге асырылады.

Президентіміздің тағы бір ма­ңызды бастамасы – «Самұ­рық-Қазына» қоры таза пайдасының кемінде 7 пайызы жыл сайын «Қазақстан халқына» қоғамдық қорына аударылады.

Екіншіден, сыбайлас жемқор­лыққа қарсы күрес саласында қабылданып жатқан шешімдер мен іс-қимылдардың нәтижесі. Бұл бастамалар тамыр-таныстық пен рушылдықты түбегейлі жо­йы­п, «парасыз қоғам» құруға ық­пал ететініне сенімдімін. Бұған конституциялық реформа аясын­да қабылданған нормалар кепілдік береді.

Мемлекет басшысының өкі­леттік мерзімінде саяси партия­ларда болуына тыйым салынады. Президент бұл норманы іске асыруды бірінші өзінен бастады, мұндай норманың әлі кү­шіне енгенін күтпестен Қ.Тоқаев «Amanat» партиясының қата­рынан шығатынын жария етті.

Президенттің жақын туыста­рына мемлекеттік саяси қыз­метшілер мен квазимемлекеттік сектор субъектілерінің басшылары лауазымдарын атқаруға тыйым салынады. Осы норма арқылы коррупция мен тамыр-таныстықтың тамырына балта шабылады деп үміттенемін. Жұмысқа орналасуда, бизнес ашуда және кез келген азамат үшін маңызды мәселені шешуде протекционизм деген ұғымның жоғалуына ықпал етеді.

Мемлекет басшысының тағы бір жақсы бастамасы – сы­бай­лас жемқорлықпен күрес бағы­тындағы іс-шаралар. Пре­зи­денттің тапсырмасымен жемқор­лардан алынған қаржы мектеп салуға жұмсалатын болды. Бүгінгі таңда республика бойынша шамамен 100 млрд теңге көлеміндегі қаражат жайында айтылып отыр.

Үшіншіден, Президент Жаңа, Әділетті Қазақстан құру жолында халықтың, әрбір азаматтың әл-ауқаты мен тұрмыс-тіршілігі бірінші орынға қояды. Бұған қатысты өзгерістерді Мемлекет басшысы «Әділетті мемлекет. Біртұтас ұлт. Берекелі қоғам» атты Жолдауында жария етті.

Халықтың әл-ауқатын жақ­сартудағы келесі маңызды қа­дам­ның бірі – халықтың белгілі бір топтарына арнайы төлем­ақы негізінде қолдау көрсету. Мемлекет басшысы Жолдауында 2023 жылғы 1 қаңтардан бастап бала күтімі үшін төлемақы төлеу мерзімін сәби бір жарым жасқа толғанға дейін ұзар­тылатынын атап өтті. Осы орайда, айта кететін жайт, 2023 жылға арналған республикалық бюджет жобасында әлеуметтік са­ланың шығыстары 2022 жылмен салыстырғанда 1 779,3 млрд теңгеге ұлғайту көзделген.

Қ.Тоқаев жария еткен баста­малардың басым бөлігі білім беру саласына бағытталған. Бұл ретте, ауыл және қала мектептері арасындағы айырмашылық азайтылып, олардың мазмұндық және тех­никалық деңгейі теңесті­рі­ле­ді. 2025 жылға дейін 800 мың баланың заманауи мектепте оқуына жағдай жасалмақ. Осы­лайша, апатты жағдайдағы және үш ауысыммен оқитын мектеп мәселесі толық шешіледі.

Бұл бастаманы жүзеге асыру үшін 2023-2025 жылдарға арналған республикалық бюджет жобасы аясында «Жайлы мектеп» жаңа пилоттық ұлттық жобасы дайындалғаны белгілі. Жоба шеңберінде үш жылдық мерзімде жалпы сомасы 2 606,6 млрд теңгеге 504 мектеп салу жос­парланып отыр.

Бұл – Жаңа, Әділетті Қазақ­станды құру жолында Президент бастамасымен жүзеге асырылып жатқан өзгерістердің бөлігі ғана. Мемлекет басшысы Қ.Тоқаев «Мемлекеттің басты міндеті – отандастарымыздың игілігі мен тұрмыс сапасын қамтамасыз ету. Әділ бәсекені дамыту, шағын және орта бизнесті қолдау» деп, елді басқаруда халықтың тұрмыс-тіршілігін жақсарту мәселесін бірінші орынға қоятынын атап өтті.

Мұның барлығы Қ.Тоқаевтың мемлекеттік басқару саласында білімі мен тәжірибесі мол, халықтың сенімін алған, кәсіби дипломат, билік жүргізуде халық­тың мұң-мұқтажын бірінші орын­ға қоятын тұлға екенінің дәлелі.

 

Ғани ТАШҚАРАЕВ,

Мәжіліс депутаты

Соңғы жаңалықтар

Ұқсас жаңалықтар