24 сағат

*Мысырда өткен прези­денттік сайлауда бұрынғы қорғаныс министрі, отстав­ка­дағы генерал Әбдел Фаттах ас-Сиси жеңіске жетті. «Мұ­сылман бауырлар» сайлау қорытындыларын мойындамайтынын мәлімдеді. Бірақ халық­аралық қоғамдастық сай­лаудың барлық халықаралық талаптарға сай өткенін танитынын хабарлап үлгерді. *Германияның Майнц қаласында 17-20 маусым күндері әуе шабуылы­нан қор­ға­ныс саласы бойынша халық­аралық конферен­­ция өтеді деп жоспар­ланған. Шараны ұйымдас­ты­ру­шылар оған қатысу тура­лы Ресейдің тапсырысын қабылдамай тастады. Мәс­кеу мұны аталған салада­ғы ынтымақтастықты тоқ­та­ту­ға қадам деп бағалап отыр. *Сербия мен Босния және Герцеговинадағы су тасқынынан Сербияда 51 адам, ал Босния және Герцеговинада 24 адам опат болғаны белгілі болып отыр. Бұл елдер тарихында бұрын-соңды болып көрмеген табиғат апаты ауыл шаруашылығы саласына да зор кесапат әкелді. Кейбір елді мекендер жермен-жексен болды. Халыққа үкімет тарапынан жәрдем керек. *Ресейде жаңа сүңгуір қайық сынақтан өткізу үшін Балтық теңізіне түсірілді. «Варшавянка» деп аталатын дизельді-электрлі сүңгуір қайық сынақтан сәтті өткен жағдайда Қара теңіз флотына жіберілмекші. Оның су бетіндегі жылдамдығы 20 узелді, сүңгу тереңдігі 300 метрді, автономды жүзуі 45 күн­ді құрайды. Экипажы – 52 адам. Су астындағы су сый­ым­дылығы шамамен 4000 тонна. *Түркияның конститу­ция­лық соты YouTube сайтына тосқауыл қойылуын заңсыз деп тапты. Конституциялық сот бейнехостингке қол­же­тімділікті шектеу азаматтардың құқын бұзу деп санайды. Ал тос­қауыл қоюдың бастамашысы елдің премьер-министрі Ре­жеп Тайып Ердоған екен. Сайтта Түркияның жоғары шен­ді ше­неуніктері Сириядағы әс­ке­ри операцияны талқыласа керек. *Ресейдің Мәскеу қала­лық соты ерлі-зайыпты Ма­гомед және Халимат Расулов­тарды сәйкесінше 18 және 12,5 жылға түрмеге қамау туралы үкім шығарды. Оларға Матвеев базарында тәртіп сақ­шысына шабуыл жасады деген айып тағылыпты. Ерлі-зайыптылар полиция 15 жастағы өспірім қызды зор­ламақ болды деген кү­дік­пен ұстамақ болған Ма­гомед Ма­го­медовке араша түссе керек. *Қытайда көшедегі әжет­хана септигіне түсіп кеткен ұялы телефонды алуға әрекет жасаған екі адам қаза тауып, тағы төртеуі зардап шеккен. Бұл оқиға Хэнань провинциясында орын алған. Қаза болғандар қалтафонын түсіріп алған келіншектің күйеуі мен оған жанұшырып көмекке ұмтылған анасы көрінеді. Ақпарат агенттіктері материалдары негізінде әзірленді.