Еуразиялық экономикалық одақ жабық ұйым емес

АСТАНА. 2 маусым. Еуразиялық экономикалық одақ сауда, ынтымақтастық үшін ашық ұйым. Сыртқы істер министрі Ерлан Ыдырысов Орталық коммуникациялар қызметінде өткен брифингте осылай деді. Бұл туралы egemen.kz тілшісі хабарлады. Е.Ыдырысов: «Еуразиялық экономикалық одақ жабық ұйым емес. Бұл ұйым өз алдына ұзақ мерзімді мақсат-міндеттер қойып отыр», – деді. Жалпы, Еуразиялық экономикалық одақтың қатысушылары өз алдына еркін мемлекеттер. Сыртқы істер министрінің айтуынша, одақ құру туралы шарт мүше-мемлекеттердің сыртқы саясаттағы еркіндігіне бөгет болмайды. Еуразиялық экономикалық одаққа мүше елдер тәуелсіз мемлекеттер болып қала береді. Естеріңізге сала кетейік, Қазақстан, Ресей және Беларусь елдерінің Президенттері Еуразиялық экономикалық одақ құру туралы шартқа 29 мамырда Астанада қол қойды. Бұл одақ 2015 жылдың бірінші қаңтарынан бастап жұмысын іске кіріседі деп күтілуде. Жолдыбай Базар. Дереккөз: egemen.kz. Фото: primeminister.kz.